Дар бозори марказии Пенза барои фурӯши хушкмеваҳои Тоҷикистон гӯшаҳои махсус ҷудо карда шуданд

ДУШАНБЕ, 03.05.2026 /АМИТ «Ховар»/. Маъмурияти бозори марказии шаҳри Пензаи Федератсияи Русия барои ба фурӯш баровардани меваҳои хушки Ҷумҳурии Тоҷикистон гӯшаҳои махсуси савдо ҷудо намуд.

Тавре мухбири АМИТ «Ховар» дар Федератсияи Русия  хабар медиҳад, ин иқдом дар доираи таҳкими равобити иқтисодию тиҷоратӣ байни ду давлат амалӣ гардида, ба густариши содироти маҳсулоти ватанӣ мусоидат мекунад.

Меваҳои хушки Тоҷикистон, аз ҷумла зардолу, мавиз, анҷир ва дигар навъҳои хушсифат бо риояи стандартҳои байналмилалӣ ба бозори вилояти Пенза ворид карда мешаванд. Ташкили растаҳои алоҳида имкон медиҳад, ки хушкмеваҳои Тоҷикистони соҳибистиқлол бо шароити беҳтар ба намоиш гузошта шуда, дастраси бештари харидорон гардад.

Коршиносон бар ин назаранд, ки чунин тадбирҳо на танҳо сатҳи содиротро афзоиш медиҳанд, балки ба муаррифии бештари маҳсулоти кишоварзии Тоҷикистон дар бозорҳои хориҷӣ заминаи мусоид фароҳам меоранд.

Ҳамзамон ин раванд метавонад ба таъсиси робитаҳои мустақими тиҷоратӣ байни истеҳсолкунандагон ва харидорони хориҷӣ мусоидат намояд.

Қобили тазаккур аст, ки вилояти Пенза бо Мақомоти иҷроияи ҳокимияти давлатии вилояти Хатлон созишномаи ҳамкорӣ ба имзо расонидааст. Дар доираи ин созишнома, интиқоли мунтазами маҳсулоти кишоварзии вилояти Хатлон ба бозорҳои вилояти Пенза ба роҳ монда мешавад.

Ин ҳамкорӣ ҳамчун қадами муҳими тақвияти робитаҳои иқтисодӣ арзёбӣ гардида, интизор меравад, ки дар оянда ҳаҷми содироти маҳсулоти ватанӣ ба Федератсияи Русия боз ҳам бештар гардад. Истифодаи чунин имкониятҳо метавонад ба рушди бахши кишоварзӣ, таъсиси ҷойҳои нави корӣ ва афзоиши даромади содиротӣ мусоидат намояд.

Бо татбиқи чунин иқдомҳо Тоҷикистон мавқеи худро дар бозорҳои байналмилалӣ тадриҷан таҳким бахшида, ба унвони содироткунандаи маҳсулоти босифати кишоварзӣ бештар шинохта мешавад.

АКС: АМИТ «Ховар»