Дар Душанбе Ҷаласаи 11-уми минтақавии Шабакаи Осиёи Марказӣ оид ба ҳифзи гуногунии биологӣ баргузор гардид

ДУШАНБЕ, 08.05.2026 /АМИТ «Ховар»/. Дар шаҳри Душанбе Ҷаласаи минтақавии аъзои Шабакаи Осиёи Марказӣ оид ба ҳифзи  гуногунии биологӣ (CABCN) баргузор шуд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Ҷаласа дар доираи ҳамкории Маркази миллии гуногунии биологӣ ва бехатарии биологии Кумитаи ҳифзи муҳити зисти назди Ҳукумати Ҷумҳурии Тоҷикистон бо Боғи  миллии Ҷумҳурии Корея ва як қатор муассисаҳои илмӣ-тадқиқотии кишварҳои Осиёи Марказӣ-Қазоқистон, Узбекистон ва Қирғизистон доир карда шуд.

Дар чорабинии минтақавӣ муовини якуми Раиси Кумитаи ҳифзи муҳити зисти назди Ҳукумати Ҷумҳурии Тоҷикистон  Исфандиёр Шукурзода гуфт, ки гуногунии биологии кишвар, бахусус захираҳои арзишманди генетикии он барои таъмини амнияти озуқаворӣ ва инчунин устувории экологӣ аҳаммияти калидӣ доранд.

Исфандиёр Шукурзода оиб ба  аҳаммияти тақвияти иқтидори илмӣ-тадқиқотӣ  барои таҳияи тадбирҳои илмӣ-асоснок ҷиҳати ҳифзи экосистемаҳои арзишманд ва дастгирии хизматрасониҳои экосистемӣ ибрози андеша кард.

Ҷаласаи минтақавӣ оид ба ҳифз ва истифодаи устувори гуногунии биологӣ бо иштироки мутахассисон ва олимони институтҳои миллии ботаника ва боғҳои ботаникии чор кишвари Осиёи Марказӣ, намояндагон ва олимони Боғи  миллии Корея, Боғи  миллии Бэкдудеган ва ташкилотҳои тадқиқотии Кореяи Ҷанубӣ таҳти раёсати Кумитаи  ҳифзи муҳити зисти назди Ҳукумати Ҷумҳурии Тоҷикистон  баргузор гардид. Ҷаласаи мазкур ҳамчун платформа барои баррасии дастовардҳои охирини илмӣ-амалӣ дар соҳаи ҳифзи захираҳои арзишманди флористӣ хизмат намуд.

Муҳокимарониҳо имкон доданд, ки самтҳои афзалиятноки кори муштарак дар доираи марҳилаи сеюми лоиҳа муайян карда шаванд, ки ба омӯзиши таркиб, ҳолати растанипӯшии ҳудудҳои муҳими флористӣ ва таҳияи тадбирҳои мувофиқи илмӣ оид ба истифодаи устувор, инчунин  ҳифзи намудҳои арзишманд равона мегарданд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон