Дар Душанбе дурнамои тақвияти ҳамкории Тоҷикистон бо БАТР баррасӣ гардид

ДУШАНБЕ, 30.05.2026 /АМИТ «Ховар»/. Тоҷикистон бо Бонки Аврупоии Таҷдид ва Рушд (БАТР) ҳамкориро тақвият медиҳад, иттилоъ медиҳад АМИТ «Ховар» бо истинод ба Бонки миллии Тоҷикистон.

Дар мулоқоти Раиси Бонки миллии Тоҷикистон Фирдавс Толибзода бо ҳайати Бонки Аврупоии Таҷдид ва Рушд (БАТР) таҳти роҳбарии ноиби Президенти БАТР оид ба масъалаҳои сиёсӣ ва ҳамкорӣ Марк Боуман масъалаҳои вобаста ба татбиқи лоиҳаҳои амалкунандаи БАТР дар Тоҷикистон, вазъи кунунӣ ва дурнамои рушди ҳамкории минбаъда баррасӣ гардиданд.

Фирдавс Толибзода саҳми Бонки Аврупоии Таҷдид ва Рушд ро ҳамчун шарики стратегӣ дар таҳкими низоми бонкии кишвар, аз ҷумла дастгирии ислоҳоти иқтисодиву молиявӣ, рушди бахши хусусӣ ва рушди устувори мамлакат назаррас арзёбӣ намуд.

Ҷонибҳо дар бораи сиёсати қурби асъор, раванди рақамикунонии низоми бонкӣ, Барномаи фишанги ҳамоҳангсозии сиёсат (PCI), комплайнс, талабот ба қарзҳои ипотекӣ, рушди бозори суғурта, тақвияти иқтидори мутахассисон дар самти риояи меъёрҳо, муқовимат ба қонунигардонии (расмикунонии) даромадҳои бо роҳи ҷиноят бадастоварда ва маблағгузории терроризм, идоракунии хавфҳо ва татбиқи усулҳои муосири назорат, маблағгузории иқтисоди “сабз”, хавфҳои тағйирёбии иқлим, сармоягузории ташкилоти қарзии молиявӣ, инчунин масъалаҳои рушди иқтисоди «сабз» ва молияи устувор мубодилаи афкор намуданд.

Дар мулоқот инчунин оид ба рушди бозори коғазҳои қиматнок, гузариш ба иқтисоди «сабз», рушди низоми суғурта, мубориза бар зидди шустушӯи пул, муаррифии татбиқи маҳсулоти Бонки Аврупоии Таҷдид ва Рушд оид ба мубодилаи маҳсулот ва масъалаҳои марбут ба хавф таваҷҷуҳ зоҳир карда шуд.

Ноиби Президенти Бонки Аврупоии Таҷдид ва Рушд Марк Боуман аз сатҳи ҳамкории мутақобили судманд бо Тоҷикистон изҳори қаноатмандӣ карда, омодагии Бонки Аврупоии Таҷдид ва Рушдро барои идомаи дастгирии ислоҳоти иқтисодиву молиявӣ, рушди низоми бонкӣ ва махсусан бахши хусусии кишвар иброз намуд.

АКС: Бонки миллии Тоҷикистон