Дар Душанбе Фестивали «Саводнокии молиявӣ» баргузор гардид

ДУШАНБЕ, 03.05.2026 /АМИТ «Ховар»/. Баланд бардоштани сатҳи саводнокии молиявии аҳолӣ яке аз омилҳои калидии рушди низоми бонкӣ, таъмини фаъолияти устувори он ва таҳкими эътимоди шаҳрвандон ба низоми молиявӣ мебошад. Чунин иброз намуд Раиси Бонки миллии Тоҷикистон Фирдавс Толибзода зимни ифтитоҳи Фестивали «Саводнокии молиявӣ» дар шаҳри Душанбе.

АМИТ «Ховар» бо истинод ба Бонки миллии Тоҷикистон иттилоъ медиҳад, ки Фестивали «Саводнокии молиявӣ» бо ташаббуси Бонки миллии Тоҷикистон, Мақомоти иҷроияи ҳокимияти давлатии шаҳри Душанбе ва дар ҳамкорӣ бо ташкилоти қарзии молиявӣ, ташкилоти суғуртавӣ ва шарикони рушд доир шуд.

Ҳадафи фестивал васеъ намудани дастрасии аҳолӣ ба хизматрасонии молиявию суғуртавӣ, муаррифии хизматрасониҳои ташкилоти қарзии молиявӣ ва ба ин васила баланд бардоштани сатҳи саводнокии молиявии аҳолӣ мебошад. Дар ин самт Бонки миллии Тоҷикистон ҳамчун танзимгари бозори молиявӣ бо дастгирии Ҳукумати Ҷумҳурии Тоҷикистон, вазорату идораҳо ва шарикони рушд тадбирҳои зарурӣ меандешад.

Таъкид шуд, ки аз соли 2022 то имрӯз дар 31 шаҳру ноҳияи кишвар бо фарогирии зиёда аз 72 ҳазор сокинон фестивалҳои «Саводнокии молиявӣ» гузаронида шуданд. Дар баробари ин, аз соли 2023 то имрӯз аз ҷониби ташкилоти қарзии молиявӣ дар саросари Тоҷикистон зиёда аз 5,6 ҳазор чорабинии маърифатӣ бо иштироки беш аз 330 ҳазор хонандагони муассисаҳои таҳсилоти миёнаи умумӣ, миёнаи касбӣ ва олӣ, кормандони корхонаву ташкилоти давлатӣ ва хусусӣ, занон ва муҳоҷирони меҳнатӣ доир гардидааст. Илова бар ин, платформаҳои иттилоотӣ, аз ҷумла сомонаи fingram.tj ва саҳифаҳои махсус дар шабакаҳои иҷтимоӣ фаъол гардида, барои баланд бардоштани дониши молиявии аҳолӣ мунтазам маводи омӯзишӣ пешниҳод мешавад.

Рушди хизматрасониҳои молиявии рақамӣ ва вусъат ёфтани ҳисоббаробаркуниҳои ғайринақдӣ дар мамлакат низ ба баланд гардидани фарҳанги молиявии аҳолӣ мусоидат мекунад. Дар ин замина, қарори Ҳукумати Ҷумҳурии Тоҷикистон «Дар бораи Барномаи баланд бардоштани саводнокии молиявии аҳолӣ барои солҳои 2026–2030» қабул гардида, он бо ҷалби тамоми сохторҳои марбута ва шарикони рушд татбиқ карда мешавад.

Иштирокдорон доир ба мавзуъҳои «Дастрасӣ ба қарзҳо барои рушди соҳибкорӣ дар минтақаҳо», «Дастгирии давлатии рушди соҳибкории занон», «Қарзҳои сабз» ва «Пешгирии амалҳои қаллобӣ» бо рӯнамоҳо сухан намуданд.

Дар доираи барномаи фестивали «Саводнокии молиявӣ» инчунин маросими ҷоизасупории озмуни «Беҳтарин ташкилоти қарзии молиявӣ дар пешниҳоди хизматрасониҳои ғайрибонкӣ ба бонувони соҳибкор» баргузор гардид. Он ба дастгирии соҳибкории занон, тарғиби хизматрасониҳои молиявӣ байни субъектҳои хоҷагидор, аҳолӣ ва махсусан занони соҳибкор, беҳтар намудани дастрасии онҳо ба хизматрасониҳои молиявӣ ва ғайримолиявӣ мусоидат мекунад.

АКС: Бонки миллии Тоҷикистон