Дар Душанбе модели ҳамкории минтақавӣ ва табодули дониш баррасӣ гардид

ДУШАНБЕ, 12.05.2026 /АМИТ «Ховар»/. Дар шаҳри Душанбе дар доираи Конфронси 35-уми минтақавии Созмони озуқаворӣ ва кишоварзии Созмони Милали Муттаҳид (ФАО) барои Аврупо ва Осиёи Марказӣ таҳти унвони «Барномаҳои шарикӣ дар Аврупо ва Осиёи Марказӣ – намунаи ҳамкории минтақавӣ ва табодули дониш» чорабинии канорӣ баргузор гардид, хабар медиҳад АМИТ «Ховар».

Ҳадафи чорабинӣ муаррифии барномаҳои шарикӣ байни ФАО ва Озарбойҷон, ФАО ва Қазоқистон ва ФАО ва Туркия ҳамчун моделҳои муассири ҳамкории минтақавӣ ва мубодилаи донишҳо ва нишон додани саҳми онҳо дар рушди устувори кишоварзӣ ва системаҳои озуқаворӣ дар Аврупо ва Осиёи Марказӣ ва берун аз он мебошад.

Зимни чорабинӣ изҳор гардид, ки ҳамоиш инчунин барои таҳлили дарсҳои асосии гирифташуда ва муайян кардани имконот барои такмили минбаъда ва такрори равишҳои шарикӣ дар доираи барномаҳои минтақавӣ ва глобалии ФАО имкон медиҳад.

Ба андешаи иштирокдорон, солҳои охир барномаҳои шарикӣ, ки аз ҷониби Созмони озуқаворӣ ва кишоварзии Созмони Милали Муттаҳид (ФАО) амалӣ мегарданд, аҳамияти стратегӣ пайдо карда, ҳамкории густурдаи онро бо кишварҳои аъзои Созмон, Иттиҳоди Аврупо, институтҳои байналмилалии молиявӣ ва дигар шарикони рушд дар Аврупо ва Осиёи Марказӣ мукаммал мегардонанд.

Ин барномаҳо ба афзалияти миллии рушди кишварҳои иштирокчӣ асос ёфта, ба ҳалли мушкилоти минтақавӣ ва фаромарзии марбут ба табдили системаҳои озуқавории кишоварзӣ, амнияти озуқаворӣ, идоракунии захираҳои табиӣ ва рушди деҳот нигаронида шудаанд.

Зарангези ЛАТИФ,
АМИТ «Ховар»

АКС: АМИТ «Ховар»