Дар Душанбе Намоишгоҳи байналмилалии молҳо ва хизматрасонӣ барои саломатӣ ва зебоӣ доир мешавад

ДУШАНБЕ, 15.05.2026 /АМИТ «Ховар»/.  Аз 18 то 20 июни соли 2026 дар Маркази намоишгоҳии байналмилалии «Dushanbe Expo» Намоишгоҳи байналмилалии молҳо ва хизматрасонӣ барои саломатӣ ва зебоӣ   баргузор мегардад. Дар ин хусус ба АМИТ «Ховар» аз Палатаи савдо ва саноати Ҷумҳурии Тоҷикистон хабар доданд. 

Намоишгоҳ  дар доираи  ҳадафи чоруми стратегии миллӣ–  саноаткунонии босуръати  мамлакат бо дастгирии Ҳукумати Ҷумҳурии Тоҷикистон  гузаронида мешавад. Мақсади он муаррифӣ намудани молу маҳсулоти ширкатҳои ватанӣ ва баланд бардоштани сатҳи сифатнокии он мебошад.

Дар назар аст, ки дар намоиш маҳсулоти косметикӣ, таҷҳизоти косметологӣ, маҳсулоти нигоҳубин ва гигиенӣ, витаминҳо, ғизои варзишӣ, таҷҳизоти тиббӣ, маҳсулоти дорусозӣ, таҷҳизоти лабораторӣ, таҷҳизоти дорусозӣ, тиббӣ, ташхисӣ,  технологияҳо ва таҷҳизоти коркарди гиёҳҳо, асбоби тиббӣ, доруҳои тайёр, маҳсулоти ортопедӣ ва протезҳо аз ҷониби ширкатҳои ватанию хориҷӣ ба намоиш ва фурӯш гузошта шаванд.

Муаррифии молу маҳсулот дар чунин намоишгоҳҳо ба  беҳтар гардидани робита байни истеҳсолкунанда ва истеъмолкунанда мусоидат намуда, барои таъмини аҳолии мамлакат бо дору, молҳои тиббии дорои сифати ҷаҳонӣ ва аз ҷиҳати иқтисодӣ дастрас замина фароҳам меорад.

Намоишгоҳ барои барқарор намудани робитаҳои тиҷоратӣ, намоиши дастовардҳои навтарин дар соҳаи тандурустӣ ва зебоӣ, омӯхтани тамоюлҳои бозор ва дурнамои рушди соҳа имконияти беназир фароҳам меорад.

 АКС: Палатаи савдо ва саноати Ҷумҳурии Тоҷикистон