Дар Душанбе оид ба Стратегияи рақамии дигаргунсозии системаҳои агроозуқаворӣ ҷаласа доир шуд

ДУШАНБЕ, 13.05.2026 /АМИТ «Ховар»/. Имрӯз дар доираи Конфронси 35-уми минтақавии Созмони озуқаворӣ ва кишоварзии Созмони Милали Муттаҳид барои Аврупо ва Осиёи Марказӣ дар мавзуи “Стратегияи рақамии дигаргунсозии системаҳои агроозуқаворӣ” ҷаласаи канорӣ баргузор гардид, иттилоъ медиҳад АМИТ «Ховар».

Чорабинии канорӣ бо мақсади пешниҳод кардани стратегияҳои имконпазири истифодаи технологияҳои рақамӣ барои тағйироти низомҳои кишоварзӣ ва озуқавории Аврупо ва Осиёи Марказӣ доир шуд. Дар он нишон дода шуд, ки чӣ гуна кори ҳамоҳангшуда дар амалисозии сиёсатҳо, ҷорӣ намудани роҳҳои технологӣ, истифодаи маълумот ва татбиқи ташабусҳо дар сатҳи маҳаллӣ имкон медиҳад, ки рақамикунонӣ дар асоси принсипҳои фарогир ва устувор анҷом дода шавад.

Иброз гардид, ки технологияҳои нави рақамӣ имконияти бесобиқаро барои баланд бардоштани ҳосилнокӣ, таҳкими устуворӣ, баланд бардоштани самаранокӣ ва суръат бахшидан ба пешрафт ба сӯи Ҳадафҳои рушди устувор пешниҳод мекунанд.

Сарфи назар аз иқтидор технологияҳои рақамӣ дар бахши кишоварзӣ ва озуқавории минтақа нобаробар қабул карда мешаванд ва фарқият ҳам дар байни кишварҳо ва ҳам дар байни гурӯҳҳои алоҳидаи аҳолӣ мушоҳида мешавад.

Татбиқи технологияҳои нави рақамӣ сатҳи пасти саводнокии рақамӣ, мавҷуд набудани системаи хуб барои ба роҳ мондани идоракунии маълумот, маҳдудият дар дастрасии нархҳо ва экосистемаи парокандаи инноватсиониро аз байн мебарад.

Зарангези ЛАТИФ,
АМИТ «Ховар»

АКС: АМИТ «Ховар»