Созишномаи маблағгузории лоиҳаи «Дастрасӣ ба бозорҳо ва мутобиқшавӣ ба чорводорӣ» ба имзо расид

ДУШАНБЕ, 27.05.2026 /АМИТ «Ховар»/. Дар шаҳри Душанбе Созишномаи маблағгузорӣ байни Ҷумҳурии Тоҷикистон ва Фонди байналмилалии рушди кишоварзӣ барои татбиқи лоиҳаи «Дастрасӣ ба бозорҳо ва мутобиқшавӣ ба чорводорӣ» (AMAL) ба имзо расонида шуд. Ҳаҷми умумии маблағгузории лоиҳа 19,7 миллион доллари амрикоиро ташкил медиҳад. Дар ин хусус ба АМИТ «Ховар» аз Вазорати молияи Ҷумҳурии Тоҷикистон хабар доданд.

Созишномаи мазкурро Вазири молияи Ҷумҳурии Тоҷикистон Файзиддин Қаҳҳорзода ва директори минтақавии Фонди байналмилалии рушди кишоварзӣ дар Тоҷикистон Роберто Лонго ба имзо расониданд.

Тавре иттилоъ дода шуд, маблағгузории лоиҳа пурра аз ҳисоби грантҳои Фонди байналмилалии рушди кишоварзӣ амалӣ мегардад. Ҳамзамон, дар доираи татбиқи он 2,3 миллион доллар аз ҳисоби саҳми Ҳукумати Ҷумҳурии Тоҷикистон пешбинӣ шудааст.

Лоиҳаи «Дастрасӣ ба бозорҳо ва мутобиқшавӣ ба чорводорӣ» (AMAL) ба баланд бардоштани сатҳи некуаҳволӣ, афзоиши даромад ва таҳкими устувории хонаводаҳои деҳоти кишвар, махсусан чорводорони хурд, равона гардидааст.

Ҳамчунин, дар доираи он беҳтар намудани маҳсулнокии соҳаи чорводорӣ, идоракунии устувори чарогоҳҳо ва мутобиқшавӣ ба тағйирёбии иқлим дар назар дошта шудааст.

Инчунин, лоиҳа ба рушди занҷири арзиши маҳсулоти чорводорӣ, дастгирии соҳибкории хурду миёна, беҳтарсозии амнияти озуқаворӣ ва густариши дастрасии деҳқонон ба бозорҳои дохилӣ ва минтақавӣ мусоидат хоҳад кард.

АКС: Вазорати молияи Ҷумҳурии Тоҷикистон