Дар Китобхонаи миллӣ оид ба таҳияи Консепсияи илмии Конуни тамаддуни ориёӣ маҳфили «Тоҷикшиносӣ» доир шуд

ДУШАНБЕ, 29.05.2026 /АМИТ «Ховар»/. 28 май дар Китобхонаи миллии  Тоҷикистон бо ташаббуси Маркази «Тоҷикшиносӣ» таҳти унвони «Шарҳу тавзеҳи Консепсияи Конуни тамаддуни ориёӣ» бо иштироки муҳаққиқони ватанӣ маҳфили навбатии «Тоҷикшиносӣ» баргузор шуд, хабар медиҳад АМИТ «Ховар».

Директори Китобхонаи миллӣ Лутфия Абдулхолиқзода оид ба аҳамияти омӯзиш ва таҳияи Консепсияи илмии Конуни тамаддуни ориёӣ, нақши он дар таҳкими худшиносии миллӣ, эҳёи арзишҳои таърихию фарҳангӣ ва рушди тафаккури миллӣ ибрози назар намуд.

Дар ҷамъомад мудири шуъбаи таърихи илм ва техникаи Институти таърих, бостоншиносӣ ва мардумшиносии ба номи Аҳмади Дониши Академияи миллии илмҳои Тоҷикистон  Абдувалӣ Шарифзода дар мавзуи «Шарҳу тавзеҳи Консепсияи илмии Конуни тамаддуни ориёӣ» маъруза намуд.

Дар ҷараёни маҳфил масъалаҳои марбут ба тамаддуни ориёӣ, арзишҳои миллӣ, нақши таърих дар ташаккули ҳувияти миллӣ ва аҳамияти илмии консепсия мавриди таҳлилу баррасӣ қарор гирифтанд.

Доктори илмҳои таърих, профессор Хаёл Бобоев фикру мулоҳизаҳои ҷолиб ва арзишманди худро доир ба маҳфили «Тоҷикшиносӣ» иброз дошт. Мавсуф аҳамияти баргузории чунин маҳфилҳои илмӣ-маърифатиро таъкид намуда, саҳми онҳоро дар рушди тафаккури илмӣ ва баланд бардоштани маърифати ҷомеа муҳим арзёбӣ кард.

Бояд гуфт, ки кормандони Маркази «Тоҷикшиносӣ» давоми фаъолият барои баланд бардоштани ҳисси ватандӯстию хештаншиносӣ ва рушди фарҳанги миллӣ якчанд маҳфилро дар мавзуъҳои зерин: «Забони миллат – ҳастии миллат», ««Тоҷикон»-и Бобоҷон Ғафуров ва марҳилаҳои худшиносии тоҷикон», «Нақши сиккаҳо дар шинохти давлати Сомониён», «Ҳифзи манфиатҳои миллӣ ва воситахои электронии ахбор дар шароити ҷаҳонишавӣ», «Шоҳнома»-и Ҳаким Фирдавсӣ ва таҳкими андешаи миллӣ», «Санъати хонасозии мардуми ориёӣ – аз варҷамкати Ҷамшед то хонаҳои анъанавии тоҷикони Бадахшон», «Чакан – мероси шигарфи фарҳанг», «Куруши Кабир ва Зулқарнайн» ва «Куруши Кабир, Эъломияи умумии ҳуқуқи башар: таҳаввули таърихии ҳуқуқи инсон ва нақши Пешвои миллат дар эҳёи ин арзишҳо» ва «Сарнавишти тоҷикон дар асари «Ҷомеъ-ут-таворих»-и Рашидуддини Фазлуллоҳ» баргузор намудаанд.

АКС: Китобхонаи миллии Тоҷикистон