Дар ноҳияи Ҷаббор Расулов нақшаи кишти чигит зиёда аз 86 фоиз иҷро гардид

ДУШАНБЕ, 19.05.2026 /АМИТ «Ховар»/. Кишоварзони ноҳияи Ҷаббор Расулови вилояти Суғд дар 4947 гектар пунбадона кишт намуданд. Дар ин хусус АМИТ «Ховар» бо истинод ба хадамоти матбуоти Раиси вилояти Суғд хабар медиҳад.

Иттилоъ дода шуд, ки дар ноҳия кишти пунбадона дар 5690 гектар ба нақша гирифта шудааст. То имрӯз дар 4947 гектар кишт анҷом ёфтааст, ки 86,9 фоизи нақшаро ташкил медиҳад.

Аъзои хоҷагии деҳқонии «Рамазон»-и ноҳия ба парвариши чигит машғул буда, имсол дар 1,5 гектар пунбадона кишт намудаанд. Ҳолати нашъунамои зироат хуб буда, гузаронидани коркарди ғизодиҳии саривақтӣ омили  фаровонҳосилӣ мебошад.

Иброз гардид, ки имрӯзҳо хоҷагидорон ва масъулин барои суръат бахшидан ба корҳои саҳроӣ, истифодаи тухмии хушсифати мутобиқ  ба иқлим ва риояи муҳлати агротехникӣ талош доранд. Аз ҷумла, масъулини соҳаи обрасонӣ уҳдадор карда шудаанд, ки деҳқононро  сари вақт бо оби полезӣ таъмин намоянд.

АКС аз бойгонӣ