Дар ноҳияи Нуробод бахшида ба Рӯзи байналмилалии оила ҳамоиши маърифатӣ доир гардид

ДУШАНБЕ, 14.05.2026 /АМИТ «Ховар»/. Бахшида ба Рӯзи байналмилалии оила (15 май) дар ноҳияи Нуробод ҳамоиши маърифатӣ доир шуд. Инчунин озмунҳои «Оилаи беҳтарин» ва «Фарзанд–боғи падару модар» ҷамъбаст гардиданд. Дар ин хусус ба АМИТ «Ховар» аз Кумитаи кор бо занон ва оилаи назди Ҳукумати Ҷумҳурии Тоҷкистон хабар доданд.

Иброз гардид, ки оилаи солим асоси ҷомеаи пешрафта буда, тарбияи дурусти фарзандон аз муҳити гарму солими оила сарчашма мегирад.   Барои ҳар фарди худогоҳу хештаншинос оила муқаддас аст. Устувору пойдории он аз муҳаббати самимӣ ва иродаи қавии зану шавҳар вобаста аст. Оиладорӣ фарҳанги бузургу ҳисси ватандӯстӣ мебошад. Агар оила солим бошаду назару андешаҳо ва иқдому амалҳояш дар зиндагӣ хушбинона бошад, дар маҷмуъ ҷомеа солим хоҳад буд.

Изҳор шуд, ки озмунҳо дар асоси нақшаи чорабиниҳои Кумитаи кор бо занон ва оилаи назди Ҳукумати Ҷумҳурии Тоҷикистон ва татбиқи «Барномаи давлатии рушди оила дар Ҷумҳурии Тоҷикистон барои солҳои 2024-2026» гузаронида шуданд. Мақсади баргузории озмунҳо гиромидошти арзишҳои оиладорӣ, арҷгузорӣ ба фарҳанги оиладорӣ, таҳкими оила, бунёд ва мустаҳкамсозии муносибатҳои оилавӣ дар заминаи меҳру муҳаббату эҳтироми якдигар ва баланд бардоштани масъулияти оила дар тарғиби фарҳанги оиладорӣ мебошад.

Баргузории чунин озмунҳо ба густариши муҳаббат, эҳтироми байниҳамдигарӣ ва масъулияти оилавӣ мусоидат намуда, дар тарбияи фарзандони солиму соҳибмаърифат нақши муассир мегузорад.

Дар ҷараёни ҳамоиш ба оилаҳо ва фарзандони фаъолу намунавӣ Сипоснома ва туҳфаҳои хотиравӣ  тақдим карда шуданд.

АКС: Кумитаи кор бо занон ва оилаи назди Ҳукумати Ҷумҳурии Тоҷикистон