Дар ноҳияи Рӯдакӣ таҳти унвони «Тоҷикона мепӯшем!» ҳамоиши занону духтарон баргузор гардид

РӮДАКӢ, 04.05.2026. /АМИТ «Ховар»/. Бо ибтикори шуъбаи кор бо занон ва оилаи назди Мақомоти иҷроияи ҳокимияти давлатии ноҳияи Рӯдакӣ дар назди муҷассамаи Исмоили Сомонӣ таҳти унвони «Тоҷикона мепӯшем!» ҳамоиши занону духтарон баргузор гардид. Дар ин хусус ба хабарнигори АМИТ «Ховар» аз Мақомоти иҷроияи ҳокимияти давлатии  ноҳияи Рӯдакӣ иттилоъ доданд.

Мақсади баргузории ҳамоиш баланд бардоштани завқи зебоипарастии шаҳрвандон,  таҳкими ҳисси худшиносии миллӣ ва  арҷ гузоштан ба фарҳангу анъанаҳои неки ниёгон, тарғибу ташвиқи либоси миллӣ, баланд бардоштани эътибори нақшу нигор, сӯзанидӯзию гулдӯзӣ, чакандӯзию зардӯзӣ дар матоъҳои миллӣ, намоиш додани ҳунари волои тарроҳону ҳунармандони ватанӣ, пешгирии хурофоту бегонапарастӣ ва тақлидкории ҷавондухтарон мебошад.

Духтарони ноҳия бо либосҳои миллӣ, аз ҷумла атласу адрас ва дигар намунаҳои ҳунари волои мардумӣ дар фазои идона ва бо руҳияи баланди ватандӯстӣ дар ин ҳамоиш иштирок  намуданд.

Ҳамоиши  мазкур дар фазои ҳамдигарфаҳмӣ, ифтихори миллӣ ва ҳамбастагии шаҳрвандон баргузор гардида, нишон дод, ки сокинони ноҳия  ба фарҳангу суннатҳои миллӣ эҳтироми хосса зоҳир менамоянд.

АКС: Мақомоти иҷроияи ҳокимияти давлатии ноҳияи Рӯдакӣ