Дар ноҳияи Шаҳринав толори хурди варзишии футбол ба истифода дода шуд

ШАҲРИНАВ, 28.05.2026 /АМИТ «Ховар»/. 25 май дар ноҳияи Шаҳринав ба ифтихори Рӯзи ҷаҳонии футбол толори хурди варзишии футбол ба истифода дода шуд. Дар ин хусус ба хабарнигори  АМИТ «Ховар» аз  Мақомоти иҷроияи ҳокимияти давлатии ноҳияи Шаҳринав иттилоъ доданд.

Толори хурди футбол  бо ташаббуси Кумитаи иҷроияи Ҳизби Халқии Демократии Тоҷикистон дар ноҳияи Шаҳринав дар ҳамкорӣ бо мақомоти иҷроияи ҳокимияти давлатии ноҳия ва соҳибкорони бонангу номуси диёр  бунёд гардид.

Ба истифода додани чунин иншооти варзишӣ имконият фароҳам меорад, ки мусобиқаҳо ва чорабиниҳои гуногуни солимгардонӣ дар сатҳи баланд баргузор гардида, оммавияти варзиш дар байни аҳолӣ, бахусус ҷавонон боло бурда шавад.

Ҳамчунин бунёди чунин толорҳо ба амалӣ гардидани  «Барномаи давлатии рушди футболи Ҷумҳурии Тоҷикистон барои солҳои 2022-2026» мусоидат мекунад.

Варзишгарони ноҳия иброз доштанд, ки имрӯзҳо бо дастгириҳои пайвастаи Пешвои миллат, Раиси Ҳизби Халқии Демократии Тоҷикистон муҳтарам Эмомалӣ Раҳмон ва таваҷҷуҳи махсуси Раиси Федератсияи футболи Тоҷикистон муҳтарам Рустами Эмомалӣ соҳаи варзиш, бахусус футбол дар мамлакат рушду тараққии бесобиқа дошта, Тоҷикистон дар арсаи байналмилалӣ ҳамчун давлати дӯстдори футбол муаррифӣ мегардад.

Маҳз бо ташаббусҳои созандаи муҳтарам Рустами Эмомалӣ Рӯзи ҷаҳонии футбол дар сатҳи байналмилалӣ мақоми хосса касб намуд.

АКС: Мақомоти иҷроияи ҳокимияти давлатии ноҳияи Шаҳринав