Дар шаҳраки Адрасмон бахшида ба Рӯзи байналмилалии оила ҳамоиши идона доир гардид

ДУШАНБЕ, 15.05.2026 /АМИТ «Ховар»/. Дар шаҳраки Адрасмон бахшида ба Рӯзи байналмилалии оила ҳамоиши идона баргузор гардид. Зимни он оилаҳои пешқадами шаҳр дастовардҳои намоёнро ба маърази тамошо гузоштанд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Гулистон хабар медиҳад.

Дар чорабинии  тантанавӣ ба якчанд кӯдаки навзод шаҳодатномаи таваллуд, ба оилаҳои намунавию ғолибони озмуни шаҳрии «Оилаи беҳтарин» ва собиқадорони мақомоти Сабти асноди ҳолати шаҳрвандӣ туҳфаҳои хотиравӣ ва сипосномаҳо тақдим карда шуданд.

Иброз гардид, ки  оила дар фарҳанги куҳанбунёди тоҷик ҳамчун ниҳоди муқаддас эътироф гардидааст, зеро беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмию таҳаммулгароӣ маҳз дар оила ташаккул меёбанд. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон таъкид намудаанд, ки «масъалаҳои маърифати оиладорӣ, баланд бардоштани масъулияти падару модарон дар таълиму тарбияи фарзанд, омода кардани фарзандон ба ҳаёти мустақилона ва пойдории оила аз ҷумлаи проблемаҳое мебошанд, ки диққати доимии тамоми мақомоти давлатӣ, муассисаҳои таҳсилотӣ ва кулли аъзои ҷомеаро тақозо менамоянд».

Дар ҳамоиш оилаҳои намунавӣ доир ба паҳлуҳои гуногуни оиладорӣ сухан гуфта, иброз доштанд, ки  дар зиндагӣ сабру таҳаммул ва ҳамдигарфаҳмӣ оиларо ба хушбахтӣ мерасонад. Оила давлати хурде мебошад, ки қонуну қоидаҳои худро дорад. Дар ҳамин макон агар фарзанд дар руҳияи ватандӯстию хештаншиносӣ тарбия ёбад, ба халқу ватани хеш содиқона хизмат менамояд.

Ёдовар мешавем, ки соли 1993 бо қарори Ассамблеяи генералии Созмони Милали Муттаҳид 15 май Рӯзи байналмилалии оила эълон гардид. Мақсад аз эълони ин рӯз  ҷалби  таваҷҷуҳи  давлату ҷомеа ба мушкилоти мавҷудаи оила ва оиладорӣ мебошад.

АКС: Мақомоти иҷроияи ҳокимияти давлатии шаҳри Гулистон