Дар шаҳри Гулистон ҷиҳати пешгирии ҳодисаҳои ғарқшавӣ ҳангоми оббозӣ бо хонандагон ва сокинон вохӯриҳо гузаронида шуд

ДУШАНБЕ, 21.05.2026. /АМИТ «Ховар»/. Масъулини бахши Раёсати Кумитаи ҳолатҳои фавқулода ва мудофиаи граждании вилояти Суғд дар шаҳри Гулистон дар байни омузгорону хонандагони муассисаҳои таҳсилоти миёнаи умумии №14, №1, Гимназияи №1-и шаҳр, Муассисаи таҳсилоти миёнаи умумии №8-и Ҷамоати шаҳраки Сирдарё, инчунин аҳолии маҳалаҳои Айнӣ ва Ҷавонӣ пеш аз ба таътили тобистона баромадани хонандагон ҷиҳати пешгирии ҳодисаҳои ғарқшавӣ вохӯриву суҳбатҳо гузарониданд. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон иттилоъ медиҳад.

Дар рафти вохӯрӣ ба иштирокдорон оид ба риояи қоидаҳои шиноварӣ, ба оббозӣ машғул нагардидан дар мавзеъҳои хавфнок, ки лавҳаҳои огоҳкунанда насб карда шудааст, маълумот дода шуд. Инчунин ба хонандагону сокинон тартиби хабардоркунии намояндагони бахши Раёсат дар шаҳр ҳангоми мушоҳида намудани ҳолатҳои ғарқшавии шаҳрвандон дар кӯлу дарёҳо фаҳмонида шуд.

Зимни гузаронидани корҳои фаҳмондадиҳӣ ба хонандагон ва сокинон риояи қоидаҳои бехатарӣ ва расонидани кумаки аввалин ба ғарқшудагон омӯзонида шуд. Аз ҷумла, ба онҳо оид ба тарзи дуруст аз об берун овардани шахси ғарқшуда, санҷиши аломатҳои ҳаётӣ (нафаскашӣ ва набз), дар ҳолати набудани нафас ва набз – фавран оғоз намудани нафаси сунъӣ ва масҳи дил, даъвати ёрии таъҷилӣ ва таъмини шароити бехатар то расидани мутахассисони соҳа маълумоти муфассал дода шуд.

Таҳлилҳо нишон медиҳанд, ки бештари ҳолатҳои ғарқшавӣ аз сабаби риоя накардани қоидаҳои оббозӣ, шиноварии кӯдакону наврасон дар ҷойҳои мамнуъ ва бе назорат мондани кӯдакон аз ҷониби калонсолон рух медиҳанд. Аз ин рӯ, падару модарон огоҳ карда шуданд, ки фарзандони худро ҳангоми ҳузур доштан дар лаби дарёву кӯлҳо беназорат нагузоранд. Хусусан, дар таътили тобистона, ки бо гарм шудани ҳаво кӯдакону наврасон майли зиёд ба оббозӣ доранд, волидон ва масъулин уҳдадоранд, ки баҳри пешгирии чунин ҳолатҳои нохуш тадбирҳои судманд андешанд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон