Дар Суғд масъалаи содироти маҳсулоти Тоҷикистон ба Озарбойҷон баррасӣ шуд

ДУШАНБЕ, 08.05.2026 /АМИТ «Ховар»/. Масъалаи рушди ҳамкории  иқтисодӣ, ҷалби сармоягузорӣ ва вазъи  дурнамои робитаҳои тиҷоратӣ,    аз ҷумла дар бахшҳои иқтисод, фарҳанг ва маориф зимни вохӯрии  Раиси вилояти Суғд Раҷаб Аҳмадзода  бо намояндагони Сафорати Озарбойҷон дар Тоҷикистон таҳти  роҳбарии Алимирзамин Аскаров баррасӣ гардид.  Дар ин хусус АМИТ «Ховар» бо истинод ба  хадамоти матбуоти Раиси вилояти Суғд хабар  медиҳад.

Дар вохӯрӣ таъкид гардид, ки  дар натиҷаи  сиёсати  хирадмандонаи роҳбарони ду давлат — Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Президенти Ҷумҳурии  Озарбойҷон муҳтарам Илҳом Алиев робитаҳо дар самтҳои иқтисодӣ, иҷтимоӣ ва фарҳангӣ рушд ёфта истодаанд.

Ҷонибҳо инчунин иброз доштанд, ки   ҳаҷми  гардиши молу маҳсулот тамоюли афзоиш дошта, татбиқи лоиҳаҳои муштарак бомуваффақият идома доранд.

Алимирзамин Аскаров сатҳи ҳамкориро баланд арзёбӣ намуда, омодагии худро барои тақвияти равобит, аз ҷумла дар бахшҳои иқтисод, фарҳанг ва маориф иброз намуд.

Дар вохурӣ таъкид гардид,  ки вилояти Суғд  дорои имкониятҳои васеи сармоягузорӣ буда, бо минтақаҳои гуногуни Озарбойҷон робитаҳои тиҷоративу иқтисодӣ ба роҳ мондааст.

Ёдоварӣ мешавем, ки сафари давлатии Президенти Озарбойҷон Илҳом Алиев ба Тоҷикистон, ки моҳи октябри соли 2025 доир гардид, ба густариши ҳамкорӣ  такони ҷиддӣ бахшид.

АКС: Хадамоти матбуоти Раиси вилояти Суғд