Дар Ёвон гулгашти фарҳангию фароғатӣ бо муҷассамаи «Рамзи футбол» ба истифода дода шуд

ДУШАНБЕ, 27.05.2026 /АМИТ «Ховар»/. Дар доираи таҷлили Рӯзи ҷаҳонии футбол (25 май) дар маркази ноҳияи Ёвон гулгашти нави фарҳангию фароғатӣ бо ҷойгир намудани муҷассамаи «Рамзи футбол» ба истифода дода шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Ёвон хабар доданд, гулгашт дар кӯчаи Меҳвари Ҷамоати шаҳраки Ёвон дар 1500 метри мураббаъ сохта шуда, дар маркази он муҷассамаи бошукуҳи «Рамзи футбол» бо баландии 12 метр насб гардидааст.

Ҳудуди иншоот бо нишастгоҳҳои замонавӣ, чароғҳои равшанидиҳанда, дарахтони ороишию ҳамешасабз ва гулҳои мавсимӣ оро ёфта, барои истироҳату фароғати сокинон ва меҳмонон шароити мусоид фароҳам оварда шудааст.

Зимни ифтитоҳи гулгашт иброз гардид, ки таҳти сиёсати варзишпарваронаи Президенти Тоҷикистон муҳтарам Эмомалӣ Раҳмон соҳаи варзиш, бахусус футбол дар ҷумҳурӣ рушду густариши бесобиқа касб намудааст. Маҳз таваҷҷуҳи доимии давлат ва Ҳукумат ба рушди инфрасохтори варзишӣ, омода намудани варзишгарони ҷавон ва ташкили мусобиқаҳои гуногун барои тарбияи насли солим, таҳкими ҳисси ватандӯстӣ ва ҷалби ҷавонон ба тарзи ҳаёти солим мусоидат менамояд.

Таъкид шуд, ки эътирофи Рӯзи ҷаҳонии футбол дар сатҳи байналмилалӣ нишонаи мақому нуфузи рӯзафзуни Тоҷикистон дар арсаи ҷаҳонӣ буда, саҳми мамлакатро дар рушди варзиш ва таҳкими ҳамкории байналмилалӣ боз ҳам бештар муаррифӣ менамояд.

Дар идомаи чорабинӣ Фестивали футбол баргузор гардид, ки дар он варзишгарони наврасу ҷавон маҳорати худро ба намоиш гузоштанд. Машқҳои намоишӣ, барномаҳои саҳнавии варзишӣ ва ҳунарнамоии иштирокчиён ба чорабинӣ шукуҳу шаҳомати хос бахшид. Инчунин байни дастаҳои наврасон ва ҷавонон мусобиқаҳои дӯстона доир гардида, иштирокчиён маҳорати баланди варзишӣ, руҳияи рақобати солим ва эҳсоси дӯстиву ҳамбастагиро ба намоиш гузоштанд.

АКС: Мақомоти иҷроияи ҳокимияти давлатии ноҳияи Ёвон