Форуми байналмилалии малакаҳо: Тоҷикистон — 2026 дар ноҳияи Данғара оғоз шуд

ДУШАНБЕ, 29.05.2026 /АМИТ «Ховар»/. 28 май дар Маркази рушди малакаҳо дар ноҳияи Данғара Форуми байналмилалии малакаҳо: Тоҷикистон – 2026 оғоз ёфт. Марказ дар доираи Лоиҳаи «Беҳтарсозии малакаҳои касбӣ ва имкониятҳои бокортаъминшавӣ»- и Вазорати меҳнат, муҳоҷират ва шуғли аҳолии Ҷумҳурии Тоҷикистон фаъолият менамояд. Дар ин хусус АМИТ «Ховар» бо истинод ба Вазорати меҳнат, муҳоҷират ва шуғли аҳолӣ хабар медиҳад.

Форуми мазкур бо дастгирии Ҳукумати Ҷумҳурии Тоҷикистон ба хотири муаррифии иқтидори малакаҳои касбии шаҳрвандони мамлакат, табодули таҷрибаи байналмилалӣ ва ба ин васила тақвияти ҳамкории минтақавию байналмилалӣ гузаронида мешавад.

Иброз гардид, ки бо ташаббуси сиёсати ғамхорона ва маорифпарваронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои ҷавонон дар омӯзиши касбу ҳунар, баланд бардоштани малакаҳои касбиву ҳаётӣ ва омӯзиши илму донишҳои муосир шароити мусоид фароҳам гардидааст.

Иштирокчиён изҳор доштанд, ки баргузории чунин форум саривақтию муҳим буда, имкони мубодилаи малакаҳо ва таҷрибаи касбиро ба мутахассисони ҷавон фароҳам меорад ва рушди робитаҳои дӯстонаро байни давлатҳо мустаҳкам месозад. Мутахассисони соҳибкасб рушди технология ва инноватсияҳоро дар самтҳои гуногун ҷорӣ мекунанд.

Дар доираи форум озмун аз рӯи касбҳои «Барқчӣ», «Андовачӣ», «Кафшергари газию барқӣ» ва «Васлгари таҷҳизоти барқии офтобӣ» байни намояндагон аз муассисаҳои таълимии таҳсилоти ибтидоӣ ва миёнаи касбии давлатҳои Осиёи Марказӣ, Ҷумҳурии Туркия ва Ҷумҳурии Мардумии Чин гузаронида мешавад. Дар озмун ҷавонони аз 17 то 35-сола иштирок мекунанд.

Лоиҳаи «Беҳтарсозии малакаҳои касбӣ ва имкониятҳои бокортаъминшавӣ» дар асоси созишномаҳои грантӣ байни Ҳукумати Ҷумҳурии Тоҷикистон ва Бонки Осиёии Рушд дар назди Вазорати меҳнат, муҳоҷират ва шуғли аҳолии Ҷумҳурии Тоҷикистон татбиқ мегардад.

Дар доираи лоиҳа марказҳои касбомӯзӣ ва хизматрасонӣ дар шаҳрҳои Хуҷанд, Бохтар, ноҳияи Восеъ ва марказҳои рушди малакаҳо дар шаҳрҳои Душанбе, Роғун ва ноҳияи Данғара бо тарҳи замонавӣ бунёд мегарданд. Дар онҳо омӯзиши даврҳои кӯтоҳмуддат, эътирофи салоҳияти касбӣ ва рушди малакаҳои касбӣ дар асоси принсипҳои методологияи нави таълим дар асоси салоҳият аз рӯйи 20 касби афзалиятноки соҳаҳои энергетика, сохтмон, сайёҳӣ ва кишоварзӣ амалӣ карда мешавад.

Ёдовар мешавем, ки Форуми байналмилалии малакаҳо: Тоҷикистон – 2026 имрӯз анҷом меёбад.

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон