Форуми байналмилалии «Об ва зеҳни сунъӣ – робитаи дуҷониба» баргузор гардид

ДУШАНБЕ, 25.05.2026 /АМИТ «Ховар»/. Имрӯз дар доираи Конфронси 4-уми сатҳи баланд оид ба Даҳсолаи байналмилалии амал «Об барои рушди устувор» дар Агентии инноватсия ва технологияҳои рақамии назди Президенти Ҷумҳурии Тоҷикистон форуми байналмилалӣ таҳти унвони «Об ва зеҳни сунъӣ – робитаи дуҷониба» баргузор гардид. Дар ин хусус ба АМИТ «Ховар» аз Агентии инноватсия ва технологияҳои рақамии назди Президенти Ҷумҳурии Тоҷикистон хабар доданд.

Дар чорабинӣ роҳбарияти Агентии инноватсия ва технологияҳои рақамӣ, намояндагони вазорату идораҳои давлатӣ, сохторҳои Созмони Милали Муттаҳид, коршиносони байналмилалӣ ва шарикони рушд, муассисаҳои илмӣ, мутахассисони соҳаи зеҳни сунъӣ ва технологияҳои рақамӣ иштирок намуданд.

Форум ҳамчун платформаи байналмилалӣ барои баррасии робитаи мутақобилаи захираҳои обӣ ва технологияҳои зеҳни сунъӣ, рушди инфрасохтори рақамии устувор ва истифодаи имкониятҳои технологияҳои инноватсионӣ дар идоракунии самараноки захираҳои обӣ баргузор гардид.

Таъкид гардид, ки Ҷумҳурии Тоҷикистон ҳамчун кишвари ташаббускори масъалаҳои глобалии об ба татбиқи технологияҳои рақамӣ, рушди иқтисоди рақамӣ ва истифодаи зеҳни сунъӣ барои ҳалли масъалаҳои вобаста ба тағйирёбии иқлим ва захираҳои обӣ аҳаммияти махсус медиҳад.

Дар доираи форум ду ҷаласаи панелӣ таҳти унвони «Об барои зеҳни сунъӣ: таъмини инфрасохтори рақамии устувор ва масъул нисбат ба захираҳои обӣ» ва «Зеҳни сунъӣ барои об: истифодаи имкониятҳои зеҳни сунъӣ барои таҳкими дастрасӣ ба захираҳои обӣ» ба масъалаҳои истифодаи самараноки захираҳои обӣ дар рушди инфрасохтори рақамӣ, фаъолияти марказҳои коркарди маълумот, татбиқи меъёрҳои экологӣ ва таъмини рушди устувори технологияҳои зеҳни сунъӣ, инчунин масъалаҳои истифодаи таҳлилҳои зеҳнӣ, мониторинги захираҳои обӣ ва истифодаи технологияҳои муосир барои пешгӯии хавфҳои вобаста ба тағйирёбии иқлим бахшида шуданд.

Иштирокчиёни форум таъкид карданд, ки ҳамгироии илм, технология ва сиёсати давлатӣ метавонад барои ҳалли масъалаҳои вобаста ба об, тағйирёбии иқлим ва рушди устувор заминаи мусоид фароҳам оварад. Ҳамчунин, зарурати рушди иқтидори кадрӣ, тақвияти ҳамкории байналмилалӣ ва татбиқи лоиҳаҳои муштараки рақамӣ дар ин самт муҳим арзёбӣ карда шуд.

Дар анҷоми чорабинӣ ҷонибҳо омодагии худро барои густариши ҳамкорӣ дар самти рушди зеҳни сунъӣ, иқтисоди рақамӣ ва татбиқи технологияҳои инноватсионӣ ҷиҳати идоракунии устувори захираҳои обӣ изҳор намуданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон