Фурӯши ғайриқонунии гиёҳҳои шифобахш пешгирӣ гардид

ДУШАНБЕ, 03.05.2026 /АМИТ «Ховар»/. Зимни амалиёти назоратӣ аз ҷониби кормандони Сарраёсати ҳифзи муҳити зист дар  шаҳри Душанбе ва шуъбаи экологӣ ва сайёҳии Раёсати Вазорати корҳои дохилии Ҷумҳурии Тоҷикистон дар шаҳри Душанбе ҳолатҳои ғайриқонунии ба фурӯш баровардани гиёҳҳои шифобахш, аз қабили чукрӣ, сиёҳалаф ва дигар намуди гиёҳҳои нодир пешгирӣ карда шуд.

АМИТ «Ховар» бо истинод ба Кумитаи ҳифзи муҳити зисти назди Ҳукумати  ҷумҳурӣ иттилоъ медиҳад, ки дар ҷараёни амалиёт маълум гардид, ки то ҳанӯз ҳолатҳои бар хилофи қонунгузории муҳити зист амал намудани шаҳрвандон мушоҳида мешаванд.

Аз ҷумла, ду сокини ноҳияи Рӯдакӣ тавассути нақлиёти шахсӣ дар ҷойҳои номуайян бе доштани ҳуҷҷати зарурӣ ба фурӯши гиёҳҳои шифобахш машғул буданд. Дар натиҷа тибқи қонунгузории амалкунанда аз тарафи нозирони Сарраёсати ҳифзи муҳити зист дар шаҳри Душанбе нисбат ба онҳо санади маъмурӣ тартиб дода шуд.

Вобаста ба пешгирии ҳолатҳои мазкур дар дигар минтақаҳои ноҳияҳои пойтахт баргузории чунин амалиёт идома меёбад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон