‎Гардиши савдо байни Тоҷикистон ва Эрон қариб 9 миллион доллар афзоиш ёфтааст

ДУШАНБЕ, 29.05.2026 /АМИТ «Ховар»/. Эрон яке аз шарикони муҳими иқтисодию тиҷоратии Тоҷикистон буда, ҳамкории мутақобили судманд байни ду кишвар солҳои охир тамоюли рӯ ба рушд дорад. Аз ҷумла, дар се моҳи аввали соли 2026 гардиши савдои хориҷӣ байни ду давлат 119,6 миллион долларро ташкил намуда, нисбат ба ҳамин давраи соли 2025 8,9 миллион доллар ё 8 фоиз афзоиш ёфтааст.

Дар ин хусус дар ҷаласаи 18-уми Комиссияи муштарак оид ба ҳамкории тиҷоратӣ, иқтисодӣ, илмӣ, техникӣ ва фарҳангии Ҷумҳурии Тоҷикистон ва Ҷумҳурии Исломии Эрон, ки таҳти раёсати ҳамраисони комиссия – Вазири энергетика ва захираҳои оби Ҷумҳурии Тоҷикистон Далер Ҷумъа ва Вазири неруи Ҷумҳурии Исломии Эрон Аббос Алиободӣ дар шаҳри Душанбе баргузор гардид, иттилоъ дода шуд.

АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад, ки иштирокдорони ҷаласа масъалаҳои муҳими марбут ба рушди ҳамкории дуҷониба дар бахшҳои иқтисоду тиҷорат, энергетика, захираҳои об, саноат, нақлиёт, сармоягузорӣ, илм ва технология, инчунин дигар самтҳои мавриди таваҷҷуҳи тарафҳоро баррасӣ намуданд.

‎Вазири энергетика ва захираҳои оби Ҷумҳурии Тоҷикистон изҳор дошт, ки бо саъю талош ва иродаи қавии роҳбарони олии ду давлат муносибатҳои дӯстона ва бародаронаи Тоҷикистону Эрон имрӯз ба сатҳи сифатан нави рушд расидаанд.

‎ Таъкид шуд, ки натиҷаҳои ҷаласаи навбатии комиссия ба боз ҳам таҳким бахшидани ҳамкории судманд, фароҳам овардани заминаи мусоид барои татбиқи тарҳҳои нави муштарак ва муайян намудани самтҳои нави ҳамкорӣ байни ду кишвари дӯсту ҳамзабон мусоидат мекунанд.

‎

‎ Дар анҷоми ҷаласа ҳамраисони комиссия Протоколи ҷаласаи 18-уми Комиссияи муштарак оид ба ҳамкории иқтисодӣ, тиҷоратӣ ва илмӣ-техникӣ байни Ҷумҳурии Тоҷикистон ва Ҷумҳурии Исломии Эронро ба имзо расониданд.

АКС: Вазорати энергетика ва захираҳои оби Ҷумҳурии Тоҷикистон