Иқтидори кишоварзию саноатии Тоҷикистон дар «Dushanbe EXPO Centre» ба маърази тамошо гузошта шуд

ДУШАНБЕ, 12.05.2026 /АМИТ «Ховар»/. Иқтидори кишоварзию саноатии Тоҷикистон дар доираи Конфронси 35-уми минтақавии Созмони озуқаворӣ ва кишоварзии Созмони Милали Муттаҳид (ФАО) барои Аврупо ва Осиёи Марказӣ дар «Dushanbe EXPO Centre» — Маркази намоишгоҳи шаҳри Душанбе ба маърази тамошои иштирокдорону меҳмонони ин чорабинӣ гузошта шуд, хабар медиҳад АМИТ «Ховар».

Мудири кулли ФАО Тсюй Дунъюй зимни шиносоӣ бо намоиши иқтидори кишоварзию саноатии Тоҷикистон ба иқтидори истеҳсолию саноатии Тоҷикистон баҳои баланд дод.

Дар намоишгоҳи маҳсулоти кишоварзию саноатии Тоҷикистон корхонаю коргоҳҳо маҳсулоти гуногуни ватанӣ, аз ҷумла меваю сабзавоти тару тоза, меваҳои хушк, асал, маҳсулоти ширӣ, нӯшокиҳо, маҳсулоти қаннодӣ, консерваҳо, маҳсулоти нассоҷӣ ва ҳунарҳои мардумиро ба намоиш гузоштанд. Ҳамчунин имконияти содиротии мамлакат, технологияҳои муосири коркарди маҳсулот ва дастовардҳои соҳаи саноати хӯрокворӣ муаррифӣ гардид.

Иштирокдорон ба сифати баланди маҳсулоти кишоварзии Тоҷикистон ва имконияти тавсеаи ҳамкории тиҷоратию сармоягузорӣ таваҷҷуҳи махсус зоҳир намуданд.

Таъкид гардид, ки чунин намоишгоҳҳо барои муаррифии иқтидори содиротии мамлакат, ҷалби сармоя ва густариши робитаҳои иқтисодию тиҷоратӣ бо кишварҳои минтақа ва ҷаҳон заминаи мусоид фароҳам меорад.

Ёдовар мешавем, ки Конфронси 35-уми минтақавии ФАО барои Аврупо ва Осиёи Марказӣ 11–15 май дар шаҳри Душанбе баргузор гардида, дар он намояндагони давлатҳо ва созмонҳои байналмилалӣ масъалаҳои марбут ба таъмини амнияти озуқаворӣ, рушди устувори кишоварзӣ ва муқовимат ба тағйирёбии иқлимро баррасӣ менамоянд.

Зарангези ЛАТИФ,
Тоҳири САИД (АКС),
АМИТ «Ховар»