Имконоти иқтисодии Тоҷикистон бо ҳайати намояндагони ширкатҳои байналмилалии молиявӣ баррасӣ шуд

ДУШАНБЕ, 25.05.2026 /АМИТ «Ховар»/. Масъалаҳои марбут ба вазъи кунунии иқтисодиёти Ҷумҳурии Тоҷикистон, имконоти сармоягузорӣ, рушди бахши хусусӣ, бозори молиявӣ ва ҷалби сармояи хориҷӣ 22 май дар мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо ҳайати намояндагони ширкатҳои байналмилалии молиявии «J.P.Morgan», «Loomis Sayles&Company», «Morgan Stanley Investment Management» ва «Global Evolution» мавриди баррасӣ қарор дода шуданд.

Тавре АМИТ «Ховар» бо истинод ба Кумитаи давлатии сармоягузорӣ ва идораи амволи давлатӣ хабар медиҳад, Султон Раҳимзода ба меҳмонон оид ба ислоҳоти иқтисодӣ, беҳтар гардидани фазои сармоягузорӣ, тадбирҳои андешида барои дастгирии соҳибкорӣ ва имконияти мавҷуда барои сармоягузорони хориҷӣ маълумоти муфассал пешниҳод намуд.

Таъкид гардид, ки Ҳукумати Ҷумҳурии Тоҷикистон ба рушди ҳамкорӣ бо доираҳои байналмилалии молиявӣ ва сармоягузорон таваҷҷуҳи хосса зоҳир намуда, барои татбиқи лоиҳаҳои афзалиятнок дар соҳаҳои энергетика, саноат, инфрасохтор, иқтисоди рақамӣ ва иқтисоди «сабз» шароити мусоид фароҳам овардааст.

Намояндагони JP Morgan ва коршиносони байналмилалӣ ба имконоти иқтисодии Тоҷикистон таваҷҷуҳ зоҳир намуда, барои таҳкими ҳамкорӣ ва омӯзиши имконияти нави сармоягузорӣ ибрози омодагӣ намуданд.

Дар фарҷом ҳамсуҳбатон барои идомаи муколамаи созанда ва густариши ҳамкории минбаъда изҳори ҳавасмандӣ намуданд.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон