ИСТИФОДАИ САМАРАНОКИ ЗАМИН. Сокини ноҳияи Панҷ дар 2 гектар гармхонаҳои доимӣ бунёд намудааст

ДУШАНБЕ, 31.05.2026 /АМИТ «Ховар»/. Бо мақсади истифодаи самараноки замин  сокини Ҷамоати деҳоти «Озодагон»- и ноҳияи Панҷ Дониёр Гулматов давоми ҳафт сол аст, ки бо аҳли хонаводааш ба кори деҳқонӣ машғул мебошад. Дониёр Гулматов дар 2 гектар гармхонаҳои доимӣ бунёд намуда, дар он навъҳои гуногуни зироатро парвариш менамояд, иттилоъ медиҳад АМИТ «Ховар».

Ҳар гармхона дар 6 садяк замин бунёд гардида, дар он 2,5 ҳазор бех ниҳол шинонида шудааст. Гармхонаҳо бо усули муосир сохта шуда, кишти зери плёнка ва обёрии қатрагӣ имкон медиҳанд, ки ҳосили хуб ба даст оварда шавад. Дар айни замон ҷамъоварии бодиринг ба анҷом расида, ҷамъоварии помидор идома дорад.

Тавре ки дар суҳбат роҳбари хоҷагӣ Дониёр Гулматов изҳор дошт, ниҳолони помидор қаблан дар қуттиҳои махсус парвариш карда шуда, сипас аз моҳи март ба гармхона кӯчонида мешаванд. Ба иттилои ӯ, аз ҳар бех ниҳоли помидор то 4 кг ҳосил гирифтан мумкин аст. Пас аз ҷамъоварии помидор дар ҷойи он моҳи август қаламфури булғорӣ шинонида мешавад, ки ҷамъоварии он то моҳи декабр идома меёбад. Дар гармхонаҳои дигари хоҷагӣ низ ҷамъоварии қаламфури булғорӣ, тезак ва боимҷон оғоз гардидааст. Дониёр Гулматов кӯшиш мекунад, ки ҳар қитъаи заминро самаранок истифода барад. Пас аз ҷамъоварии картошка дар ҷойи он зироати полезӣ ва карам шинонидааст, ки аллакай дар нашъунамо буда, ғарқи ҳосилбандиянд. Инчунин байнми ҳар бех ниҳоли полезӣ каду ва лӯбиё низ шинонида шуда, ҳар яке бо тарзи махсус ва саривақтӣ нигоҳубин карда мешавад.

Фаъолияти пурсамари кишоварзони ин ноҳия аз он шаҳодат медиҳад, ки истифодаи замин дар инҷо хуб ба роҳ монда шудааст. Деҳқонони ноҳия талош менамоянд, ки аз заминҳояшон то се ҳосили фаровон ба даст оранд. Зеро ин омил имконият медиҳад, ки на танҳо хонавода бо озуқаворӣ, инчунин бозорҳои истеъмолӣ низ бо маҳсулоти ватанӣ таъмин карда шаванд.

АКС: АМИТ «Ховар»