Коршиносони хориҷӣ нақши Тоҷикистонро чун давлати ташаббускор дар ҳалли масъалаҳои глобалии обу иқлим назаррас арзёбӣ намуданд

ДУШАНБЕ, 26.05.2026 /АМИТ «Ховар»/. 25 май дар Донишгоҳи байналмилалии сайёҳӣ ва соҳибкории Тоҷикистон кори Форуми сеюми иқтисодӣ таҳти унвони «Идоракунии устувори захираҳои об дар шароити тағйирёбии иқлим» идома ёфт.

Тавре АМИТ «Ховар» бо истинод ба Донишгоҳи байналмилалии сайёҳӣ ва соҳибкорӣ хабар медиҳад, дар бахшҳои алоҳидаи форум профессорону олимон ва донишмандони варзидаи дохиливу хориҷӣ доир ба масъалаҳои мубрами идоракунии самараноки захираҳои об, таъсири тағйирёбии иқлим ба муҳити зист, истифодаи технологияҳои муосир дар ҳифзи захираҳои табиӣ, таъмини амнияти экологӣ ва рушди устувори иқтисоди «сабз» ибрози андеша намуданд.

Зимни муҳокимаҳо иброз гардид, ки дар шароити имрӯза масъалаи истифодаи оқилонаи захираҳои об ба яке аз самтҳои муҳими ҳамкории байналмилалӣ мубаддал гардида, тақозо менамояд, ки давлатҳо ва муассисаҳои илмӣ дар заминаи ҳамдигарфаҳмӣ ва мубодилаи таҷриба ҳамкориро густариш диҳанд.

Ҳамзамон коршиносон ва донишмандони хориҷӣ нақши Ҷумҳурии Тоҷикистонро ҳамчун давлати ташаббускор дар ҳалли масъалаҳои глобалии обу иқлим назаррас арзёбӣ намуда, аз иқдомҳои байналмилалии Президенти мамлакат муҳтарам Эмомалӣ Раҳмон дар самти ҳифзи захираҳои об ва рушди устувор ёдовар шуданд.

Дар идомаи кори форум иштирокчиён барои таҳкими ҳамкории илмию таҳқиқотӣ, татбиқи лоиҳаҳои муштарак ва ҷалби технологияҳои навин барои ҳифзу истифодаи самараноки захираҳои об пешниҳодҳои мушаххас манзур намуданд.

АКС: Донишгоҳи байналмилалии сайёҳӣ ва соҳибкории Тоҷикистон