Мудири кулли ФАО: «Дар самти истифодаи самараноки захираҳои табиии обу замин бояд оқилона муносибат кард»
ДУШАНБЕ, 12.05.2026 /АМИТ «Ховар»/. Дар раванди тағйирёбии иқлим ва афзоиши офатҳои табиӣ дар сайёра ҷомеаи ҷаҳон, хусусан давлатҳои Аврупо ва Осиёи Марказӣ бояд дар ҳамбастагӣ барои рафъи мушкилоти марбут ба таъмини амнияти озуқаворӣ тадбирҳои муштараки саривақтӣ ва муассир андешанд. Чунин иброз намуд Мудири кулли Созмони озуқаворӣ ва кишоварзии Созмони Милали Муттаҳид (ФАО) Тсюй Дунъюй зимни суханронӣ дар Конфронси 35-уми минтақавии Созмони озуқаворӣ ва кишоварзии Созмони Милали Муттаҳид барои Аврупо ва Осиёи Марказӣ, иттилоъ медиҳад хабарнигори АМИТ «Ховар».
Тсюй Дунъюй афзуд, ки бояд дар самти муносибат бо захираҳои табиӣ, аз ҷумла истифодаи самараноки обу замин ва дигар захираҳои табиӣ, инчунин баланд бардоштани ҳосилнокӣ, азхудкунии заминҳои нав ва ба ҳолати кишоварзӣ даровардани онҳо, ки дар таъмини амнияти озуқавории аҳолии ҷаҳон нақши бориз мебозанд, вобаста ба раванди тағйирёбии иқлим оқилона ва дурандешона муносибат карда шавад.
Иброз гардид, ки пайомадҳои тағйирёбии иқлим моро водор месозанд, ки дар самти рушди соҳаи кишоварзӣ дар асоси тавсияҳо ва хулосаҳои олимону мутахассисон ва коршиносони соҳа усулҳои навро ҷорӣ намоем.
Мудири кулли Созмони озуқаворӣ ва кишоварзии Созмони Милали Муттаҳид инчунин ҳайатҳо ва намояндагони кишварҳои Аврупо, Осиёи Марказӣ ва дигар созмонҳои байналмилалию минтақавиро ба таҳкими ҳамкории муштараку самарабахш дар самти иттилоърасонӣ ва табодули маълумоти сареъ доир ба пешгирӣ аз пайомадҳои офатҳои табиӣ, хусусан обхезӣ ва хушксолӣ, истифодаи самараноки сармоя, ҷалби сармояи дохилӣ дар самти рушду тавсеаи соҳаи кишоварзӣ бо мақсади баланд бардоштан ва таъмини амнияти озуқаворӣ даъват намуд.
Тсюй Дунъюй баён намуд, ки Конфронси 35-уми минтақавии Созмони озуқаворӣ ва кишоварзии Созмони Милали Муттаҳид барои Аврупо ва Осиёи Марказӣ, ки имрӯзҳо пойтахти Тоҷикистон- шаҳри Душанбе аз он мизбонӣ мекунад, майдони фарохи ҳамкорӣ фароҳам меорад. Он ба ҳалли марбут ба мушкилоти озуқаворӣ, рушди соҳаи кишоварзӣ ва пешрафту шукуфоии кишварҳо, хусусан давлатҳои Осиёи Марказӣ ва Аврупо равона гардидааст.
Ёдовар мешавем, ки аз 11 то 15 май Душанбе мизбони Конфронси 35-уми минтақавии Созмони озуқаворӣ ва кишоварзии Созмони Милали Муттаҳид (ФАО) барои Аврупо ва Осиёи Марказӣ мебошад. Баррасии масъалаҳои муҳими таъмини амнияти озуқаворӣ, рушди устувори соҳаи кишоварзӣ, истифодаи оқилонаи захираҳои табиӣ ва рушди минтақаҳои деҳот аз ҳадафҳои асосии конфронс мебошанд. Дар ҷаласа таваҷҷуҳи махсус ба масъалаи табдили низоми агроозуқаворӣ дар шароити тағйирёбии иқлим, буҳронҳои иқтисодӣ ва афзоиши хатарҳои ҷаҳонӣ равона мегардад.
Марзия САИДЗОДА,
АМИТ «Ховар»
АКС: АМИТ «Ховар»
Дар Тоҷикистон низоми электронии E-PERMIT ба кор дароварда шуд
Дар хоҷагии деҳқонии «Ҳолиёр Қурбонов»-и Қубодиён дар 11 гектар меваю зироат парвариш мешавад
РУШДИ ПАРАНДАПАРВАРӢ. Дар Зафаробод сохтмони фабрикаи мурғпарварӣ идома дорад
МАСЛИҲАТИ МУТАХАССИС. Истеъмоли зардолу фаъолияти зеҳнӣ ва хотираро беҳтар мекунад
ИСТИФОДАИ САМАРАНОКИ ЗАМИН. Сокини ноҳияи Панҷ дар 2 гектар гармхонаҳои доимӣ бунёд намудааст
Дар Душанбе дурнамои тақвияти ҳамкории Тоҷикистон бо БАТР баррасӣ гардид
Дар Душанбе оид ба сохтмони корхонаи «энергия аз партовҳо» вохӯрӣ доир шуд
«САФЕДДАРА» — МАКОНЕ, КИ ҲАР САЙЁҲ ОРЗУИ ДУБОРА ДИДАНИ ОНРО ДОРАД! Иштирокдорони Конфронси чоруми оби Душанбе аз тамошои ин гӯшаи нотакрори Тоҷикистон эҳсоси хушҳолӣ намуданд
Дар мулоқоти вазирони энергетика ва оби Тоҷикистон ва Либия натиҷаҳои Конфронси сатҳи баланди оби Душанбе баррасӣ шуданд
Гурӯҳи кории Хадамоти зиддиинҳисорӣ барои танзими нархи семент дар бозорҳои ҷумҳурӣ санҷиш гузаронид
Ғолибони Озмуни ҷумҳуриявӣ таҳти унвони «Ҷавонон– муқобили коррупсия» қадрдонӣ карда шуданд
Дар Остона ҷаласаи 12-уми Шурои сиёсати саноатии кишварҳои аъзои ИДМ баргузор гардид
