Мудири кулли ФАО Тсюй Дунъюй: «Ба Президенти Тоҷикистон барои дар сатҳи баланд баргузор намудани Конфронси 35-уми минтақавии СММ изҳори миннатдорӣ менамоям»
ДУШАНБЕ, 12.05.2026 /АМИТ «Ховар»/. Пеш аз ҳама, мехостам миннатдории худро ба мардуми тоҷик ва Президенти Тоҷикистон барои дар сатҳи баланд баргузор намудани Конфронси 35-уми минтақавии Созмони озуқаворӣ ва кишоварзии Созмони Милали Муттаҳид (ФАО) барои Аврупо ва Осиёи Марказӣ баён намоям, иброз дошт мудири кулли ФАО Тсюй Дунъюй зимни суҳбат бо хабарнигори АМИТ «Ховар».
Ба андешаи мудири кулли ФАО, баргузории ин конфронс ба Тоҷикистон имкон медиҳад, ки арзишҳои милливу фарҳангӣ, захираҳои табиӣ ва таомҳои миллиро таблиғ кунад. Ин барои Тоҷикистон имконияти ҷалби таваҷҷуҳи иловагии шарикони байналмилалӣ ба соҳаҳои истеҳсоли тухмӣ, обёрӣ, кишоварзии рақамӣ, коркарди озуқаворӣ, рушди чарогоҳҳо ва идоракунии устувори захираҳои табиӣ мебошад.
«Барои кишоварзон ва сокинони деҳот конфронс метавонад маънои васеъ шудани дастрасӣ ба технологияҳои муосир, дониш, маблағгузорӣ ва бозорҳоро дошта бошад. Ғайр аз ин, конфронс имконияти кишоварзии Тоҷикистонро ба шарикони байналмилалӣ, бахусус дар соҳаҳои кишоварзии кӯҳӣ, истеҳсоли органикӣ ва системаҳои устувори кишоварзӣ муаррифӣ мекунад. Мо Конфронси 35-уми минтақавии Созмони озуқаворӣ ва кишоварӣ дар Душанберо ҳамчун сармоягузории муҳим дар ояндаи кишоварзӣ ва минтақаҳои деҳоти Тоҷикистон мешуморем», — гуфт Тсюй Дунъюй.
Конфронс имконият фароҳам меорад, ки иштирокчиён Тоҷикистонро на танҳо ҳамчун давлате, ки мушкилоти обшавии пиряхҳо, релефи кӯҳӣ, заминҳои маҳдуди киштро ҳал мекунад, балки ҳамчун озмоишгоҳи зинда барои роҳи ҳалли устувор бинанд.
Ҳамзамон ин раванд метавонад ба таъсиси робитаҳои мустақими тиҷоратӣ байни истеҳсолкунандагон ва харидорони хориҷӣ мусоидат намояд.
«Давоми сӣ соли охир мардум ва Ҳукумати Тоҷикистон дар якҷоягӣ бо ташкилоти ФАО ҳамкории густурда доранд, ки тавассути он амнияти озуқаворӣ дар мамлакат таъмин карда шуд. На танҳо амнияти озуқаворӣ, балки гуногунии маводи озуқаворӣ низ таъмин гардид. Дар доираи барномае, ки мо дар ташкилоти ФАО зери унвони «Як кишвар, як маҳсулот» пешбарӣ мекунем, зардолуи тоҷик таблиғ карда мешавад. Он имконият медиҳад, ки ин меваи Тоҷикистон ба дигар давлатҳо содирот карда шавад», — гуфт Тсюй Дунъюй.
Ба таъкиди мудири кулли ФАО, дар ин конфронс намояндагони давлатҳои Аврупо иштирок доранд, ки метавонанд аз таҷрибаи Тоҷикистон баъзе чизҳоро омӯзанд. Яъне на танҳо минтақаи Аврупо, балки тамоми ҷаҳон метавонад тавассути ин конфронс аз таҷрибаи якдигар баҳравар гардад.
Зарангези ЛАТИФ,
АМИТ «Ховар»
АКС: АМИТ «Ховар»
Тавсеаи ҳамкории Тоҷикистон бо ЮНИСЕФ дар соҳаи ҳифзи муҳити зист баррасӣ гардид
Дар Душанбе Форуми байналмилалии нассоҷии Тоҷикистон – 2026 доир мегардад
РАШТ ДАР ДАВРОНИ СОҲИБИСТИҚЛОЛӢ. Мулоҳизаҳо оид ба нақши сиёсати давлатӣ дар рушди иқтисодию иҷтимоии ин ноҳия
Дар Тоҷикистон шумораи субъектҳои хоҷагидори амалкунанда беш аз 100 ҳазор зиёд гардидааст
Дар Тоҷикистон дар 25 соли охир ҳаҷми истеҳсоли маҳсулоти кишоварзӣ 122 баробар афзоиш ёфтааст
Кормандони Бонки миллии Тоҷикистон ҷашни Истиқлоли давлатиро бошукуҳ таҷлил намуданд
Эмомалӣ Раҳмон: «Даромади буҷети давлатӣ дар солҳои соҳибистиқлолӣ беш аз 250 баробар зиёд гардид»
Пешвои миллат Эмомалӣ Раҳмон: «То соли 2037 Тоҷикистонро пурра ба кишвари «сабз» табдил медиҳем»
РОҲИ 35-СОЛАИ НИЗОМИ БОНКИИ ТОҶИКИСТОН: аз бунёди низоми мустақили бонкӣ то бонкдории рақамӣ
РУШДИ САНОАТ. Дар давраи Истиқлолияти давлатӣ Душанбе ба маркази воқеии саноат, савдо ва хизматрасонӣ табдил ёфт
Эмомалӣ Раҳмон: «Бо саҳми соҳибкорони ватандӯст ва шахсони саховатпеша зиёда аз 10 ҳазор километр роҳҳои маҳаллӣ навсозӣ гардида, 273 пул бунёд гардид»
Ҷамшед Ҷумахонзода: «Соҳаи сайёҳӣ ба яке аз самтҳои афзалиятноки рушди иқтисоди Тоҷикистон табдил ёфтааст»
