Нақши Тоҷикистон ҳамчун пешбарандаи дипломатияи об дар ҳамоиши байналмилалӣ дар Абузабӣ таъкид гардид

ДУШАНБЕ, 15.05.2026 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Амороти Муттаҳидаи Арабӣ Ашрафҷон Гулов  дар ҳамоиши Вазорати корҳои хориҷии Амороти Муттаҳидаи Арабӣ иштирок намуд.

Тавре ба АМИТ «Ховар» аз Сафорати Ҷумҳурии Тоҷикистон дар Амороти Муттаҳидаи Арабӣ  хабар доданд, ҳамоиш ба раванди омодагӣ ба Конфронси оби Созмони Милали Муттаҳид, ки таҳти ҳамраисии Амороти Муттаҳидаи Араб ва Ҷумҳурии Сенегал дар шаҳри Абузабӣ 8-10 декабри соли 2026 баргузор мегардад, бахшида шуд.

Дар ҳамоиш роҳбарони намояндагиҳои дипломатӣ ва ташкилоти минтақавию байналмилалии муқим иштирок намуда, оид ба нақши Ҷумҳурии Тоҷикистон ҳамчун мамлакати ташаббускори ҷаҳонӣ ва пешбарандаи дипломатияи об дар арсаи байналмилалӣ сухан карданд.

Сафири Тоҷикистон дар Амороти Муттаҳидаи Арабӣ Ашрафҷон Гулов дар ҳамоиш доир ба ҳадафҳои Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор», солҳои 2018–2028, ки аз 25 то 28 майи соли 2026 дар шаҳри Душанбе баргузор мегардад сухан гуфта, аҳаммияти онро ҳамчун абзори мусоид барои оғози муколама ва шарикӣ қабл аз Конфронси оби СММ-2026 таъкид намуд.

АКС: Сафорати Ҷумҳурии Тоҷикистон дар Амороти Муттаҳидаи Арабӣ