Намояндагони Палатаи савдо ва саноати Тоҷикистон дар намоишгоҳи байналмилалӣ иштирок намуданд

ДУШАНБЕ, 19.05.2026 /АМИТ «Ховар»/. Намояндагони Палатаи савдо ва саноати Тоҷикистон дар Намоишгоҳи нуҳуми байналмилалии нақлиёти интеллектуалӣ, инфрасохтори роҳ ва саноати муҳандисии Синҷон, ки дар шаҳри Урумчии Ҷумҳурии Мардумии Чин баргузор гардид, иштирок намуданд. Дар ин хусус АМИТ «Ховар» бо истинод ба Палатаи савдо ва саноати Ҷумҳурии Тоҷикистон хабар медиҳад.

Дар доираи намоишгоҳ бо иштироки намояндагони Тоҷикистон, Қазоқистон ва Чин конфронс баргузор шуд.

Бо ташаббуси кумитаи рушди нақлиёт ва логистика ва кумитаи рушди тиҷорати сабзи назди Палатаи савдо ва саноати Ҷумҳурии Тоҷикистон намояндагони кумитаҳои мазкур, мақомоти давлатӣ ва бахши хусусии Тоҷикистон дар намоишгоҳ ва конфронс иштирок намуданд.

Дар Намоишгоҳи 9-уми байналмилалии Синҷон истеҳсолкунандагони чинӣ таҳияҳои инноватсионӣ ва роҳҳои ҳалли навро дар соҳаи нақлиёт, технологияҳо ва таҷҳизот барои сохтмони роҳҳо, таҷҳизоти махсус, истгоҳҳои пуркунӣ ва дастгоҳҳои ҳавопаймоии бесарнишин муаррифӣ намуданд.

Иштирокчиёни конфронс дар бораи вазъи рушди сохторҳои нақлиётӣ ва татбиқи технологияҳои навтарин дар бахши нақлиёт маълумот пешниҳод карданд.

Дар ҳамоиш байни ширкатҳои чинӣ ва Палатаи савдо ва саноати Тоҷикистон мубодилаи афкор ва муайян кардани самтҳои ҳамкорӣ доир гардид.

АКС: Палатаи савдо ва саноати Ҷумҳурии Тоҷикистон