Намояндагони Тоҷикистон дар Форуми умумиҷаҳонии шаҳрҳо дар Боку иштирок намуданд

ДУШАНБЕ, 18.05.2026 /АМИТ «Ховар»/. 17 май дар шаҳри Бокуи Ҷумҳурии Озарбойҷон Форуми умумиҷаҳонии шаҳрҳо  баргузор гардид, ки дар кори он ҳайати Тоҷикистон таҳти роҳбарии  Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Низом Мирзозода иштирок намуд. Дар ин хусус АМИТ «Ховар» бо истинод ба Кумитаи меъморӣ ва сохтмони назди Ҳукумати Ҷумҳурии Тоҷикистон хабар медиҳад. 

Форум ба масъалаҳои рушди устувори шаҳрҳо, татбиқи Рӯзномаи нави шаҳрӣ, рушди инфрасохтори шаҳрӣ, истифодаи технологияҳои муосир ва рақамикунонии соҳаи шаҳрсозӣ бахшида шуд. Он ҳамчун майдони муҳими табодули таҷриба ва густариши ҳамкории байналмилалӣ арзёбӣ гардид.

Дар доираи форум Низом Мирзозода дар мавзуи «Рушди соҳаи сохтмон ва инфрасохтори шаҳрӣ дар Ҷумҳурии Тоҷикистон» оид ба дастовардҳои Ҷумҳурии Тоҷикистон дар самти рушди шаҳрсозӣ, сохтмон ва бунёди инфрасохтори муосир маълумоти муфассал пешниҳод кард. Таъкид гардид, ки давоми солҳои соҳибистиқлолии Тоҷикистон ин бахши ҳаётан муҳим дар мамлакати мо дар доираи татбиқи сиёсати бунёдкоронаи роҳбарияти олии сиёсии давлат ва амалисозии барномаю стратегияҳои мушаххас ба пешрафтҳои назаррас ноил гардид.

Ҳамзамон  ба иштирокдорони форум навори видеоии «Душанбе -марвориди Шарқ» намоиш дода шуд, ки дар он дастовардҳои Ҷумҳурии Тоҷикистон дар соҳаҳои меъморӣ, сохтмон ва рушди шаҳрҳо, аз ҷумла бунёди иншооти муҳими давлатӣ ва иҷтимоӣ, инчунин раванди рушди босуръати шаҳри Душанбе намоиш дода мешавад.

Дар форум байни намояндагони давлатҳо масъалаҳои рушди шаҳрсозӣ, истифодаи таҷрибаи муосир ва густариши ҳамкорӣ дар соҳаи меъморӣ ва сохтмон мавриди баррасӣ қарор гирифта, ҷонибҳо барои таҳкими ҳамкории байналмилалӣ ва мубодилаи таҷриба изҳори ҳавасмандӣ намуданд.

АКС: Кумитаи меъморӣ ва сохтмони назди Ҳукумати Ҷумҳурии Тоҷикистон