Нишасти Шурои ҳамоҳангсози шарикони рушд оид ба рақамикунонӣ баргузор гардид

ДУШАНБЕ, 05.05.2026. /АМИТ «Ховар»/. Дар шаҳри Душанбе нишасти Шурои ҳамоҳангсози шарикони рушд оид ба масъалаҳои рақамикунонӣ таҳти роҳбарии муовини якуми Сарвазири Ҷумҳурии Тоҷикистон Ҳоким Холиқзода баргузор гардид, ки дар он «Барномаи миёнамуҳлати рушди иқтисоди рақамӣ дар Ҷумҳурии Тоҷикистон барои солҳои 2026–2030» муаррифӣ карда шуд.

АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад, ки дар барнома самтҳои асосӣ ва маҷмуи тадбирҳо барои суръат бахшидани раванди рақамикунонӣ муайян карда шудаанд.

Дар ҷараёни нишаст роҳбарияти Агентии инноватсия ва технологияҳои рақамӣ натиҷаҳои асосии раванди рақамикунонӣ ва самтҳои афзалиятноки рушди рақамии мамлакатро муаррифӣ намуд.

Ҳамзамон гуфта шуд, ки рушди устувори рақамикунонӣ бе дастрасии интернети босифат ва боэътимод имконнопазир аст. Дар ин замина роҳбарияти Хадамоти алоқа «Стратегияи рушди соҳаи алоқаи Ҷумҳурии Тоҷикистон барои давраи то соли 2040»-ро муаррифӣ намуд, ки ҳадафи он таъмини фарогирии интернети паҳнбанд ва баланд бардоштани сифати хизматрасонии алоқа дар саросари мамлакат мебошад.

Шарикони рушд инчунин барои густариши ҳамкории мутақобили судманд ва дастгирии ташаббусҳои рақамикунонии мамлакат изҳори омодагӣ намуданд.

Дар анҷоми нишаст ҷонибҳо оид ба қадамҳои минбаъда барои таҳкими ҳамкорӣ ба мувофиқа расида, аҳамияти ҳамоҳангсозии талошҳо ва татбиқи лоиҳаҳои муштаракро таъкид карданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон