ОИЛА-МАКОНИ МЕҲРУ САДОҚАТ. Дар ноҳияи Варзоб барномаи фарҳангию фароғатӣ баргузор шуд

ДУШАНБЕ, 15.05.2026  /АМИТ «Ховар»/. Бахшида ба Рӯзи байналмилалии оила бо ташаббуси Кумитаи иҷроияи Марказии Ҳизби Халқии Демократии Тоҷикистон дар ҳамкорӣ бо Мақомоти иҷроияи ҳокимияти давлатии ноҳияи Варзоб таҳти унвони «Оила – макони меҳру садоқат» барномаи фарҳангию фароғатӣ баргузор гардид. Дар ин хусус ба АМИТ «Ховар» аз Кумитаи иҷроияи ҳизб хабар доданд.

Дар ҳамоиш ба 10 нафар навхонадорон аз ҷониби масъулини бахши Сабти асноди ҳолати шаҳрвандӣ ба таври тантанавӣ шаҳодатномаи ақди никоҳ ва туҳфаҳои Кумитаи иҷроияи марказии Ҳизби Халқии Демократии Тоҷикистон супорида шуданд. Ба чанд кӯдаки навзод низ шаҳодатномаи таваллуд ва туҳфаҳо супорида шуданд.

Мардуми шарифи Тоҷикистон аз рӯзгори бостон то имрӯз бо фарҳанги волои оиладорӣ, ҳамсоянавозӣ ва ватанпарварию миллатдӯстӣ машҳур гардидаанд.

Оила – макони меҳру садоқат буда, ҷое аст, ки дар он фазои меҳру муҳаббатро ҳар узви хонадон эҳсос менамояд. Дар оила инсонҳо ҳамдигарро дастгирӣ намуда, эҳтиром менамоянд ва дар ҳар лаҳзаи хушию ғам паҳлуи ҳам меистанд. Оила пояи устувори зиндагӣ ва макони таълим ва тарбияи инсони солим мебошад.

АКС: Кумитаи иҷроияи марказии Ҳизби Халқии Демократии Тоҷикистон