Ғолибони Озмуни ҷумҳуриявӣ таҳти унвони «Ҷавонон– муқобили коррупсия» қадрдонӣ карда шуданд

ДУШАНБЕ, 30.05.2026 /АМИТ «Ховар»/. 29 май бо ташаббуси Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар ҳамбастагӣ бо дигар вазорату идораҳо дар бинои Филармонияи давлатии Тоҷикистон ба номи Акашариф Ҷӯраев маросими ҷоизасупорӣ ба ғолибони Озмуни ҷумҳуриявӣ таҳти унвони «Ҷавонон–муқобили коррупсия» баргузор карда шуд.

Тавре ба АМИТ «Ховар» аз Агентии назорати давлатии молиявӣ ва мубориза бо коррупсия хабар доданд, озмун бахшида ба 35-солагии Истиқлоли давлатии Ҷумҳурии Тоҷикистон ва дар доираи «Моҳвораи ҷавонон» аз 25 апрел то 23 май гузаронида шуд. Ҳадафи он аз баланд бардоштани мафкураи ҳуқуқии зиддикоррупсионии аҳолӣ ва ҷалби таваҷҷуҳи ҷомеа, бахусус ҷавонон ба масъалаи муқовимат ба коррупсия иборат буд.

Дар чорабинӣ директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Сулаймон Султонзода, роҳбарият ва шахсони масъули Прокуратураи генералӣ, вазоратҳои фарҳанг, маориф ва илм, Агентии инноватсия ва технологияҳои рақамӣ, кумитаҳои ҷавонон ва варзиш, оид ба таҳсилоти ибтидоӣ ва миёнаи касбӣ, телевизион ва радио, инчунин масъулин ва донишҷӯёни муассисаҳои таълимии олӣ ва миёнаи касбии ҷумҳурӣ, намояндагони ташкилоти байналмилалӣ, ҷомеаи шаҳрвандӣ ва воситаҳои ахбори омма иштирок намуданд.

Дар вазъияти тантанавӣ ғолибони даври ниҳоии Озмуни ҷумҳуриявӣ таҳти унвони «Ҷавонон–муқобили коррупсия» дар номинатсияҳои «Мақолаи беҳтарин», «Саҳнача ё видеоролики иҷтимоии беҳтарин» ва «Ташаббуси муосири зиддикоррупсионӣ (аз ҷумла, бо истифода аз технологияи рақамӣ)» аз рӯйи ҷойҳои якум, дуюм ва сеюм, инчунин ҷойҳои ифтихорӣ бо «Диплом», «Сипоснома», ҷоиза, мукофотпулӣ ва дигар туҳфаҳои хотиравӣ қадрдонӣ карда шуданд.

Дар фарҷом барои болидахотирии иштирокчиён барномаи фарҳангӣ – фароғатӣ пешкаш карда шуд.

АКС: Агентии назорати давлатии молиявӣ ва мубориза бо коррупсияи Ҷумҳурии Тоҷикистон