РАВАНДИ ОБИ ДУШАНБЕ. Дар Риёз нишасти матбуотӣ оид ба Конфронси чоруми байналмилалии сатҳи баланд баргузор гардид

ДУШАНБЕ, 05.05.2026. /АМИТ «Ховар»/. 4 май Сафорати Ҷумҳурии Тоҷикистон дар Подшоҳии Арабистони Саудӣ дар ҳамкорӣ бо Маркази тадқиқоти «Халиҷ» (GRC)  дар Риёз нишасти матбуотӣ  оид ба Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор», 2018–2028, ки аз 25 то 28 майи соли 2026 дар шаҳри Душанбе баргузор мегардад, доир  намуд.

Тавре ба АМИТ «Ховар» аз Сафорати Ҷумҳурии Тоҷикистон дар Арабистони Саудӣ хабар доданд, дар чорабинӣ роҳбарони намояндагиҳои дипломатӣ ва созмонҳои байналмилалии муқими Риёз, коршиносон ва намояндагони воситаҳои ахбори омма иштирок намуданд.

Сафири Фавқулода ва Мухтори Ҷумҳурии Тоҷикистон дар Арабистони Саудӣ Акрам Каримӣ дар бораи ташаббусҳои байналмилалии Тоҷикистон дар соҳаи обу иқлим, раванди оби Душанбе ва инчунин дар бораи омодагӣ ба Конфронси чоруми оби Душанбе маълумоти муфассал дод.

АКС: Сафорати Ҷумҳурии Тоҷикистон дар Арабистони Саудӣ