РАВАНДИ ОБИ ДУШАНБЕ. Устувории низомҳои озуқаворӣ дар давраи камбуди ҷаҳонии об дар Душанбе баррасӣ гардид

ДУШАНБЕ, 25.05.2026 /АМИТ «Ховар»/. Тибқи арзёбиҳои созмонҳои байналмилалӣ дар ҷаҳон зиёда аз ду миллиард аҳолӣ ба оби нӯшокии бехатар дастрасии кофӣ надорад ва то соли 2050 талабот ба захираҳои обӣ метавонад беш аз 30 фоиз афзоиш ёбад. Инчунин зиёда аз 70 фоизи захираҳои обҳои ширини ҷаҳон дар соҳаи кишоварзӣ истифода шуда, тағйирёбии иқлим ва коҳиши захираҳои обӣ ба амнияти озуқавории миллионҳо нафар аҳолии ҷаҳон таҳдиди ҷиддӣ эҷод менамояд. Ин нукта дар «Форуми таъмини устувори низомҳои озуқаворӣ дар давраи камбуди ҷаҳонии об», ки дар доираи Конфронси 4-уми сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» 25 май дар шаҳри Душанбе баргузор гардид, таъкид карда шуд.

Хабарнигори АМИТ «Ховар» иттилоъ медиҳад, ки дар форум муовини Сарвазири Ҷумҳурии Тоҷикистон Дилрабо Мансурӣ оид ба ташаббусҳои глобалии Ҳукумати Ҷумҳурии Тоҷикистон дар соҳаи обу иқлим ва ҳифзи пиряхҳо сухан намуда, баргузории «Форуми таъмини устувори низомҳои озуқаворӣ дар давраи камбуди ҷаҳонии об»-ро воситаи муҳим дар самти таҳкими ҳамкории кишварҳои ҷаҳон дар таъмини озуқаворӣ дар шароити камбуди об арзёбӣ намуд. Гуфта шуд, ки имрӯз тағйирёбии иқлим ва коҳиши захираҳои об ҷомеаи ҷаҳониро ба ҷустуҷӯи роҳҳои нави идоракунии самараноки захираҳои табиӣ водор сохта, зарурати ҳамоҳангсозии талошҳои кишварҳоро бештар менамояд.

Ҳамчунин зикр гардид, ки Ҳукумати Ҷумҳурии Тоҷикистон таҳти роҳбарии Пешвои миллат барои таъмини амнияти озуқаворӣ ва ҳифзи муҳити зист тадбирҳои муҳимро амалӣ менамояд.

Дар форум Ректори Донишгоҳи байналмилалии сайёҳӣ ва соҳибкории Тоҷикистон Убайдулло Асрорзода иброз намуд, ки масъалаи истифодаи самараноки захираҳои об ва таъмини амнияти озуқаворӣ имрӯз ба яке аз масъалаҳои калидии ҷомеаи ҷаҳонӣ табдил ёфтааст. Таъкид шуд, ки Ҷумҳурии Тоҷикистон ҳамчун кишвари ташаббускор дар самти масъалаҳои обу иқлим ҳамеша дар арсаи байналмилалӣ ташаббусҳои созандаро пешниҳод намуда, дар таҳкими ҳамкории байналмилалӣ дар ин самт саҳми назаррас мегузорад.

Ректори Донишгоҳи Созмони Милали Муттаҳид Тшилидзи Марвала, ки ҳамзамон муовини Дабири кулли СММ мебошад, аз ташаббусҳои глобалии Президенти Ҷумҳурии Тоҷикистон муҳтарам Эмомалӣ Раҳмон дар соҳаи об ва иқлим ҳамчун иқдомҳои ибратбахш ва дорои аҳаммияти ҷаҳонӣ ёдовар шуд. Гуфта шуд, ки ташаббусҳои Тоҷикистон дар масъалаҳои вобаста ба захираҳои об, аз ҷумла Даҳсолаи байналмилалии амал «Об барои рушди устувор, солҳои 2018–2028» барои муттаҳид намудани ҷомеаи ҷаҳонӣ ҷиҳати ҳалли мушкилоти глобалӣ заминаи мусоид фароҳам овардааст.

Иштирокдорони форум масъалаҳои марбут ба таъмини низомҳои устувори озуқаворӣ, истифодаи оқилонаи захираҳои об, таъсири тағйирёбии иқлим ба иқтисодиёт ва роҳҳои таҳкими ҳамкории байналмилалиро баррасӣ намуда, доир ба татбиқи технологияҳои муосир ва рушди иқтисоди «сабз» табодули афкор намуданд.

Дар анҷом таъкид гардид, ки баргузории чунин ҳамоишҳои сатҳи баланд барои таҳкими ҳамкории илмӣ, густариши муколамаи байналмилалӣ ва ҷалби таваҷҷуҳи ҷомеаи ҷаҳонӣ ба масъалаҳои мубрами обу иқлим аҳаммияти муҳим дорад.

Марзия САИДЗОДА,
АМИТ «Ховар»

АКС: АМИТ «Ховар»