Раванди татбиқи лоиҳаҳои «Дастгирии соҳаи кишоварзӣ дар заминаи ҷомеа+» ва «Барқарорсозии низоми экологӣ ва устувории кишоварзӣ дар Тоҷикистон» баррасӣ шуд

ДУШАНБЕ, 28.05.2026 /АМИТ «Ховар»/. Масъалаҳои марбут ба раванди татбиқи лоиҳаҳои «Дастгирии соҳаи кишоварзӣ дар заминаи ҷомеа+» (CASP+) ва «Барқарорсозии низоми экологӣ ва устувории кишоварзӣ дар Тоҷикистон» дар вохӯрии Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода ва директори барномаҳои Фонди байналмилалии рушди кишоварзӣ дар Тоҷикистон Роберто Лонго баррасӣ  шуданд. Дар ин хусус АМИТ «Ховар» бо истинод ба Кумитаи ҳифзи муҳити зист хабар медиҳад.

Баҳодур Шерализода саҳми назарраси лоиҳаҳои аз ҷониби фонд маблағгузоришавандаро дар татбиқи барномаҳо ва стратегияҳои миллӣ оид ба мутобиқшавӣ ба тағйирёбии иқлим, коҳиш додани ихроҷи газҳои гулхонаӣ, инчунин бунёду барқарорсозии ҷангалзор таъкид намуд.

Ҳамчунин масъалаҳои ҷалби бештари маблағгузории иқлимӣ барои таҳия ва татбиқи лоиҳаҳои афзалиятноки миллӣ ва минтақавӣ дар соҳаҳои кишоварзӣ, ҷангал ва ҳифзи муҳити зист мавриди муҳокима қарор дода шуданд. Аз ҷумла, иброз гардид, ки Созишномаи маблағгузорӣ барои татбиқи лоиҳаи нави «Дастрасӣ ба бозор ва мутобиқшавӣ дар соҳаи чорводорӣ» ба имзо расид.

Дар анҷоми мулоқот ҷонибҳо бо изҳори қаноатмандӣ аз сатҳи ҳамкории мавҷуда таъкид карданд, ки имконот барои ҷалби бештари маблағгузории иқлимӣ ҳанӯз ҳам фаровон мебошанд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон