Равиши ҳамгироёнаи идоракунии захираҳои об дар меҳвари Форуми 7-уми байналмилалӣ дар Душанбе қарор гирифт

ДУШАНБЕ, 25.05.2026 /АМИТ «Ховар»/. Имрӯз дар Институти масъалаҳои об, гидроэнергетика ва экологияи Академияи миллии илмҳои Тоҷикистон таҳти унвони «Равиши NEXUS дар Осиёи Марказӣ: илм, сиёсат ва амалия» Форуми 7-уми байналмилалӣ баргузор гардид, иттилоъ медиҳад мухбири АМИТ «Ховар».

Форуми мазкур олимону коршиносони минтақавӣ, намояндагони созмонҳои байналмилалӣ ва шарикони рушдро ҷамъ оварда, масъалаҳои марбут ба идоракунии ҳамгироёнаи захираҳои об, рушди устувор ва ҳамкории минтақавиро мавриди баррасӣ қарор дод.

Зимни ҳамоиш иштирокдорон таъкид намуданд, ки дар Осиёи Марказӣ таъсири тағйирёбии иқлим, рушди иқтисодӣ ва афзоиши талабот ба об мушкилотро дар байни бахшҳои обёрӣ, гидроэнергетика, таъминоти коммуналӣ ва ниёзҳои гидрогеологӣ бештар гардонидааст.

Директори Маркази ҳалли устувор тавассути гидрогеологияи амалӣ ва ҳамкории илмии Донишгоҳи Варшава Шамми Пури зимни суханронӣ изҳор дошт, ки «имрӯз ҷомеаи ҷаҳонӣ дар шароите қарор дорад, ки масъалаҳои вобаста ба об, энергетика, амнияти озуқаворӣ ва муҳити зист беш аз ҳар вақти дигар ба ҳам алоқаманданд. Дар чунин вазъ татбиқи равиши муосири NEXUS ё равиши ҳамгироёнаи идоракунии захираҳо аҳамияти калидӣ дорад. Дар ин раванд нақши илм бисёр муҳим буда, таҳқиқоти илмӣ имкон медиҳанд таъсири тағйирёбии иқлим ба захираҳои об муайян гардида, барномаҳои истифодаи устувории об ва энергия таҳия карда шаванд».

Шамми Пури саҳми муассисаҳои илмии кишварҳои Осиёи Марказӣ, бахусус Академияи миллии илмҳои Тоҷикистонро дар пешбурди таҳқиқоти илмӣ вобаста ба масъалаҳои об, гидроэнергетика, экология ва тағйирёбии иқлим назаррас арзёбӣ намуд.

Таъкид гардид, ки бо вуҷуди аҳамияти калидӣ доштани обҳои зеризаминӣ онҳо ҳанӯз ҳам дар банақшагирӣ ва сиёсати давлатӣ ба таври кофӣ ба назар гирифта намешаванд. Аз ин рӯ, форум ба масъалаи идоракунии муштараки обҳои рӯизаминӣ ва зеризаминӣ дар доираи равиши NEXUS дар минтақаи Осиёи Марказӣ таваҷҷуҳи махсус зоҳир намуд.

Ҳамзамон иштирокдорони форум изҳор доштанд, ки ин чорабинӣ на танҳо муҳокимаи техникӣ, балки майдони муҳими гуфтугӯ оид ба идоракунӣ, ҳамкории минтақавӣ, нақши ниҳодҳои маблағгузор, мубодилаи дониш ва саҳми насли оянда дар ҳалли масъалаҳои вобаста ба об ва иқлим ба ҳисоб меравад.

Ёдовар мешавем, ки дар доираи ташаббусҳои ҷаҳонии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Конфронси 4-уми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028» пойтахти мамлакат–шаҳри Душанбе аз 25 то 28 майи соли 2026 мизбони баргузории чорабиниҳои муҳими байналмилалӣ мебошад.

Файзалӣ ҚУРБОНЗОДА,
АМИТ «Ховар»

АКС: АМИТ «Ховар»