«RED BUS TOURS». Имрӯз дар Душанбе мавсими нави хатсайрҳои сайёҳии дохилишаҳрӣ оғоз мегардад
ДУШАНБЕ, 30.05.2026 /АМИТ «Ховар»/. Шуруъ аз имрӯз дар шаҳри Душанбе мавсими нави хатсайрҳои сайёҳии дохилишаҳрии «Red Bus Tours» («Саёҳат тавассути автобусҳои сурх») оғоз мегардад. Дар ин хусус ба АМИТ «Ховар» аз шуъбаи рушди сайёҳии Мақомоти иҷроияи ҳокимияти давлатии шаҳри Душанбе хабар доданд.
Ба муносибати оғози мавсим шоми имрӯз сайру саёҳат тавассути автобусҳои дуқабата барои сокинон ва меҳмонони пойтахт ба таври ройгон ташкил карда мешавад. Иқдоми мазкур бо ташаббуси Мақомоти иҷроияи ҳокимияти давлатии шаҳри Душанбе дар ҳамкорӣ бо ширкатҳои сайёҳии «King Tour» ва «Somon Travel» амалӣ мегардад.
Ҳадаф аз ташкили хатсайрҳои сайёҳии дохилишаҳрӣ муаррифии имконияту зарфияти сайёҳии пойтахт, фароҳам овардани шароити мусоиди фароғатӣ барои сокинону меҳмонон, ҷалби бештари сайёҳони дохиливу хориҷӣ ва рушди фарҳанги сайёҳӣ дар шаҳр мебошад.
Дар доираи ин барнома иштирокчиён бо мавзеъҳои таърихию фарҳангӣ ва ҷолиби диққати шаҳри Душанбе шинос шуда, аз роҳбаладон бо забонҳои тоҷикӣ, русӣ ва англисӣ оид ба таърих, фарҳанг ва имконияти сайёҳии пойтахт маълумоти муфассал мегиранд. Ҳамзамон барои болидахотирии меҳмонон барномаҳои фарҳангиву фароғатӣ низ пешниҳод карда мешаванд.
Рӯзи ифтитоҳ ҷамъшавӣ барои иштирокчиёни хатсайри аввал соати 19:00 дар назди «Шаршара»-и Муассисаи давлатии «Боғи Наврӯзгоҳ» ва барои иштирокчиёни хатсайри дуюм соати 19:00 дар назди Театри давлатии академии опера ва балети ба номи Садриддин Айнӣ (Майдони 800-солагии Москва) муайян карда шудааст.
Мавсими нави «Red Bus Tours» то моҳи октябри соли 2026 идома ёфта, дар марҳилаи аввал рӯзҳои истироҳатӣ ва минбаъд вобаста ба талаботи сайёҳон ҳамарӯза ташкил карда мешавад. Дар доираи лоиҳа ҳамчунин хатсайри сайёҳии Душанбе — Ҳисор низ фаъолият намуда, ҳар ҳафта рӯзҳои шанбе хизмат мерасонад.
Хоҳишмандон метавонанд барои иштирок дар хатсайрҳои ройгон тавассути саҳифаҳои расмии шуъбаи рушди сайёҳии Мақомоти иҷроияи ҳокимияти давлатии шаҳри Душанбе дар шабакаҳои иҷтимоӣ ва ё тавассути ширкатҳои сайёҳии «King Tour» ва «Somon Travel» номнавис шаванд.
Ёдовар мешавем, ки лоиҳаи «Red Bus Tours» аз соли 2024 амал намуда, ба яке аз барномаҳои маъруфи сайёҳии пойтахт табдил ёфтааст.
АКС: шуъбаи рушди сайёҳии Мақомоти иҷроияи ҳокимияти давлатии шаҳри Душанбе
ЗЕБОИҲОИ НОТАКРОРИ ТАБИАТИ ДАРАИ СИЁМА. Он қалби иштирокдорони Конфронси чоруми сатҳи баланди оби Душанберо тасхир намуд
«RED BUS TOURS». Дар Душанбе мавсими хатсайрҳои сайёҳии дохилишаҳрӣ оғоз мегардад
РАВАНДИ ОБИ ДУШАНБЕ. Пагоҳ иштирокдорони Конфронси оби Душанбе бо иқтидори обӣ ва ёдгориҳои таърихию фарҳангии Тоҷикистон шинос мешаванд
Коршиносони хориҷӣ нақши Тоҷикистонро чун давлати ташаббускор дар ҳалли масъалаҳои глобалии обу иқлим назаррас арзёбӣ намуданд
Ҳамкории Донишгоҳи байналмилалии сайёҳӣ ва соҳибкории Тоҷикистон бо Донишгоҳи СММ тақвият меёбад
РАВАНДИ ОБИ ДУШАНБЕ. Иштирокчиёни Конфронси 4-уми байналмилалӣ мавзеъҳои ҷолиби Тоҷикистонро тамошо мекунанд
Дар Донишгоҳи байналмилалии сайёҳӣ ва соҳибкории Тоҷикистон олимпиадаи ҷумҳуриявӣ ҷамъбаст шуд
Дар Душанбе Ниммарафони байналмилалии «One run» баргузор шуд
Дар Донишгоҳи байналмилали сайёҳӣ ва соҳибкории Тоҷикистон коргоҳи коромӯзӣ барои устодон ва донишҷӯён ифтитоҳ ёфт
Муовини якуми Раиси шаҳри Душанбе бо ҳайати шаҳри Санкт-Петербурги Федератсияи Русия вохӯрӣ намуд
Дар Душанбе Рӯзҳои шаҳри Санкт-Петербург доир мегарданд
Дар Душанбе Озмуни шаҳрии «Оилаи беҳтарин» ҷамъбаст гардид
