САҲМИ МАН ДАР ШАҲРИ МАН. Бо ҷалби волонтёрон дар пойтахт ҳашарҳои экологӣ гузаронида мешаванд

ДУШАНБЕ, 30.05.2026 /АМИТ «Ховар»/. Шуруъ аз имрӯз, 30 май бахшида 35-солагии Истиқлолияти давлатии Ҷумҳурии Тоҷикистон ҳар ҳафта- рӯзҳои шанбе таҳти унвони «Саҳми ман дар шаҳри ман» иқдоми шаҳрии ҷавонон доир карда мешавад. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Душанбе хабар доданд.

Иқдоми мазкур дар пойтахт аз соати 07:00 то 10:00 баргузор гардида, дар доираи он ҷавонон кӯчаю хиёбон, боғу гулгашт, атрофи бино, хобгоҳҳо, иншооти ташкилоту муассисаҳо, шаҳраку маҳаллаҳо ва майдончаҳои варзишии пойтахтро тоза менамоянд.

Иқдоми мазкур дар доираи супоришҳои Раиси шаҳри Душанбе аз ҷониби Мақомоти иҷроияи ҳокимияти давлатии шаҳри Душанбе ва Клуби «Волонтёрони экологӣ» ба нақша гирифта шудааст.

Мақсад аз баргузор намудани ҳамоиши мазкур  тозаву озода нигоҳ доштани шаҳри Душанбе,  пайравии ҷавонони пойтахт аз ташаббусҳои созанда ва бунёдкоронаи Раиси шаҳри Душанбе муҳтарам Рустами Эмомалӣ мебошад.

Дар ин ташаббуси экологӣ иштироки дастҷамъонаи ҷавонони касбу кори гуногун ва корхонаву муассисаҳои ҳудуди пойтахт дар назар дошта шудааст. Аз ҷумла, кормандони ҷавони ташкилоту муассисаҳо, донишҷӯёни донишгоҳу донишкадаҳо, намояндагони  соҳаи тандурустӣ, фарҳанг, маориф, варзиш, истиқоматкунандагони хобгоҳҳо зимни ин иқдом кӯчаву гулгашт, боғҳо, каналу ҷӯйбор, майдончаҳои варзишӣ, муассисаҳои таълимӣ, бемористон ва оромгоҳҳои ҳудуди шаҳри Душанберо тоза менамоянд.

Иқдоми мазкур ҳамзамон ба хотири тарбияи хуб, рӯ овардани ҷавонон ба корҳои созандагию бунёдкорӣ ва расидан ба қадри моликияти ҷамъиятӣ гузаронида мешавад.

АКС аз манбаъҳои боз