Сафири Тоҷикистон бо сармуҳаррири рӯзномаи «Ар-Раъй»-и Давлати Кувайт вохӯрӣ намуд

ДУШАНБЕ, 12.05.2026 /АМИТ «Ховар»/. Сафири Ҷумҳурии Тоҷикистон Зубайдулло Зубайдзода бинобар ба анҷом расидани фаъолияташ дар кишвари иқомат бо сармуҳаррири рӯзномаи «Ар-Раъй»-и Давлати Кувайт Валид Ал-Ҷосим вохӯрӣ намуд.

Тавре ба АМИТ «Ховар» аз Сафорати Ҷумҳурии Тоҷикистон  дар  Давлати Кувайт  хабар доданд, зимни вохӯрӣ ҷонибҳо доир ба нақши воситаҳои ахбори омма дар таҳкими муносибатҳои дуҷониба, густариши муколама байни халқҳо, тақвияти равобит байни давлатҳо ва дигар мавзуъҳои мавриди таваҷҷуҳи муштарак табодули афкор карданд, ки дар ин хусус мақолае дар сомонаи ин рӯзномаи бонуфуз ба нашр расид. Аз ҷумла, гуфта шудааст, ки Зубайдулло Зубайдзода аз саҳми ин нашрия дар инъикоси воқеии рӯйдодҳо ва таҳкими муносибатҳои дӯстонаи Ҷумҳурии Тоҷикистон ва Давлати Кувайт изҳори қадрдонӣ кардааст.

Ҳамзамон таъкид шудааст, ки сафир ифтитоҳи Сафорати Давлати Кувайт дар шаҳри Душанберо марҳилаи муҳим дар таърихи муносибатҳои дуҷониба арзёбӣ намуда, онро натиҷаи талошҳо ва иродаи қавии роҳбарияти олии ду мамлакат донистааст.

Дар идома таъкид шудааст, ки расонаҳои касбӣ ва ҳирфаӣ дар таҳкими эътимод байни миллатҳо нақши муҳим дошта, аҳаммияти хабар на танҳо ба дурустии он, балки ба тарзи пешниҳоду замони нашраш низ, бахусус дар шароити ҳассоси минтақа ва ҷаҳон вобаста мебошад.

Ҳамчунин сафир аз таҷрибаи тӯлонии фаъолияти дипломатияш дар Кувайт ёдовар шуда, таъкид намудааст, ки тақрибан 13,5 сол дар Давлати Кувайт фаъолият карда, барои муаррифии Тоҷикистон ва таҳкими ҳузури он дар ҷомеаи Кувайт талош варзидааст. Ба иттилои мавсуф, давоми солҳои охир бо талошҳои муштарак муносибатҳои ду мамлакат дар самтҳои сиёсӣ, иқтисодӣ ва мардумӣ ба таври назаррас рушд намудаанд.

Дар қисмати поёни мусоҳиба сафир аз ҳамкории созандаи рӯзномаи «Ар-Раъй» бо Сафорати Ҷумҳурии Тоҷикистон дар Давлати Кувайт изҳори қаноатмандӣ намуда, таъкид кардааст, ки ин расона дар таҳкими муколама ва густариши робитаҳои дӯстонаи Тоҷикистону Кувайт саҳми назаррас гузоштааст.

АКС: Сафорати Ҷумҳурии Тоҷикистон  дар  Давлати Кувайт