Сироҷиддин Муҳриддин: «Ҳамкории муассир ягона роҳи устувори ҳалли мушкилоти муштараки об мебошад»
ДУШАНБЕ, 27.05.2026 /АМИТ «Ховар»/. Тақрибан 10 сол қабл Маҷмаи Умумии Созмони Милали Муттаҳид бо ризоият қатъномаеро қабул кард, ки Даҳсолаи байналмилалии амал «Об барои рушди устувор, солҳои 2018-2028»-ро эълон намуд. Ин ташаббус, ки аз ҷониби Тоҷикистон пешниҳод ва аз ҷониби ҷомеаи ҷаҳонӣ дастгирӣ гардид, инъикоси фаҳмиши муштараки мост, ки об барои рушди устувор, рафъи камбизоатӣ, саломатӣ ва некуаҳволии аҳолӣ ва ноил шудан ба Ҳадафҳои рушди устувор муҳим аст. Чунин иброз дошт Вазири корҳои хориҷии Ҷумҳурии Тоҷикистон Сироҷиддин Муҳриддин дар ҷаласае, ки бахшида ба натиҷаҳои асосии Даҳсолаи байналмилалии амал «Об барои рушди устувор, солҳои 2018-2028» баргузор гардид.
Ба гуфтаи вазири корҳои хориҷии Тоҷикистон, Даҳсола бори дигар аҳамияти таҳкими идоракунии устувор ва ҳамгирошудаи захираҳои об, инчунин густариши ҳамкорӣ ва шарикӣ дар ҳама сатҳҳоро тасдиқ кард.
Сироҷиддин Муҳриддин дастовардҳои Даҳсоларо ҷамъбаст намуда, таъкид кард, ки дар тӯли солҳо масъалаи об дар рӯзномаи ҷаҳонӣ ба зинаи баланд бардошта шуда, иродаи сиёсӣ дар соҳаи об дар тамоми сатҳҳо таҳким ёфта, дарки ҳамкориҳо дар соҳаи об яке аз василаҳои муассир барои пешбурди дипломатияи об мебошад.
«Имрӯз об на танҳо ҳамчун манбаи табиӣ, балки ҳамчун омили стратегии муайянкунандаи рушди устувор ва ҳамкории байналмилалӣ баррасӣ мешавад. Конфронси оби Созмони Милали Муттаҳид-2023, ки ба баррасии миёнамуҳлати ҳамаҷонибаи Даҳсолаи амалҳои об бахшида шудааст, нишон дод, ки ҷаҳон зарурияти таъхирнопазирии даҳсолаи амалиёти обро эътироф мекунад», — изҳор дошт вазири корҳои хориҷии Тоҷикистон.
Таъкид гардид, ки сарфи назар аз ҳама талошҳо, ҷаҳон то ҳол дар расидан ба Ҳадафи 6-и рушди устувор ба таври ҷиддӣ қафо мондааст. Миллиардҳо нафар то ҳол ба оби ошомиданӣ ва беҳдошт дастрасӣ надоранд. Норасоии об торафт бад мешавад. Пиряххо бо суръати ташвишовар об мешаванд. Хушксолию обхезӣ тез-тез ва харобиовар мешаванд. Тағйирёбии иқлим, пеш аз ҳама, тавассути об зоҳир мегардад.
«Стратегияи миллии мо оид ба об то соли 2040 ва барномаҳои давлатии марбут ба рушди соҳаи об муосир, самаранок ва ба иқлим тобовар нигаронида шудааст. Дар сатҳи минтақавӣ мо ба таҳкими ҳамкории фаромарзӣ дар соҳаи об дар Осиёи Марказӣ аҳамияти хосса медиҳем. Мо итминон дорем, ки муколама, эҳтироми мутақобила ва ҳамкории муассир ягона роҳи устувори ҳалли мушкилоти муштараки об мебошанд. Баррасии ниҳоии ҳамаҷониба дар соли 2028 набояд танҳо як конфронси дигар бошад», — афзуд Сироҷиддин Муҳриддин.
Зарангези ЛАТИФ,
АМИТ «Ховар»
АКС: АМИТ «Ховар»
Дар Вена масъалаҳои таҳкими ҳамкории илмӣ-фарҳангии Тоҷикистон ва Австрия баррасӣ гардиданд
Сироҷиддин Муҳриддин бо ҳамоҳангсози доимии СММ дар Тоҷикистон мулоқот намуд
Дар Анқара машваратҳои сиёсӣ байни вазоратҳои корҳои хориҷии Тоҷикистон ва Туркия баргузор шуданд
Масоили ҳамкорӣ дар соҳаи моликияти зеҳнӣ байни Тоҷикистон ва Корея баррасӣ гардид
Дар Теҳрон ҳамкории дуҷониба байни Тоҷикистон ва Эрон баррасӣ шуд
Сафири Тоҷикистон бо Вазири давлатии вазорати федералии корҳои хориҷии Олмон оид ба корҳои Аврупо мулоқот намуд
Ҳайати Ҷумҳурии Тоҷикистон бо иқтидори саноатии вилояти Брест шинос гардид
Дар Қоҳира масъалаҳои таҳкими ҳамкорӣ дар самти таблиғи фарҳанги сулҳ баррасӣ шуданд
Доир ба Даҳсолаи байналмилалӣ оид ба таҳкими сулҳ барои наслҳои оянда дар Ҳисор ҳамоиш баргузор шуд
Дар Брест ҷаласаи 19-уми Комиссияи байниҳукуматии Тоҷикистону Беларус баргузор гардид
Ташаббусҳои байналмилалии Пешвои миллат дар таҳкими сулҳи ҷаҳонӣ ва рушди маърифати ҳуқуқӣ баррасӣ шуданд
Вазири корҳои хориҷии Тоҷикистон нусхаи эътимодномаи сафири нави Кувайтро қабул намуд
