«Somon Air» ҳавопаймоҳои нави Boeing-737 дастрас менамояд

ДУШАНБЕ, 19.05.2026 /АМИТ Ховар»/. Ширкати ҳавопаймоии ватании «Somon Air» тасмим гирифтааст, ки тобистони соли 2026 ҳавопаймоҳои нави тамғаи Boeing-737 MAX 8 дастрас намуда, ба Тоҷикистон интиқол диҳад. Дар ин хусус АМИТ «Ховар» бо истинод ба ширкати ҳавопаймоии «Somon Air» иттилоъ медиҳад.

Дар иртибот ба ин роҳбарияти ширкати ҳавопаймоии «Somon Air» бо намояндагони ширкати Boeing масоили омодагиро барои ба истифода додани ҳавопаймоҳои нави Boeing 737 MAX 8-ро баррасӣ намуданд.

Ҷонибҳо инчунин масоили калидии марбут ба истифодаи ҳавопаймоҳои нав, инчунин маҷмуи тадбирҳоро барои баланд бардоштани самаранокии амалиёт ва беҳтар намудани фаъолияти ширкати ҳавопаймоӣ мутобиқи стандартҳои байналмилалӣ мавриди баррасӣ қарор доданд.

Гуфта шуд, ки васеъ намудани парки ширкат бо ҳавопаймоҳои замонавӣ ба ширкати ҳавопаймоии «Somon Air» имкон медиҳад, ки сифати хизматрасониро ба мусофирон беҳтар намуда, шабакаи хатсайрҳояшро васеъ намояд ва мавқеи худро дар бозори минтақавии авиатсияи гражданӣ таҳким бахшад.

АКС: «Somon Air»