Тоҷикистон тасмим гирифтааст, ки то соли 2040 дастрасии ҳадди ақалл 90 фоизи аҳолиро ба оби мутамарказ таъмин намояд

ДУШАНБЕ, 26.05.2026 /АМИТ «Ховар»/. Барои суръат бахшидан ба раванди ноилшавӣ ба Ҳадафи шашуми рушди устувор дар Тоҷикистон «Стратегияи миллии об то соли 2040» ва «Барномаи давлатии таъминоти оби нӯшокӣ ва беҳдошт барои солҳои 2025–2029» қабул гардидаанд. Ин нуктаро Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 26 май зимни суханронӣ дар Конфронси 4-уми байналмилалии сатҳи баланд оид ба Даҳсолаи байналмилалии амал «Об барои рушди устувор», солҳои 2018-2028, ки дар шаҳри Душанбе оғоз гардид, иброз намуданд.

Ба андешаи Сарвари давлати Тоҷикистон, ин санадҳо афзалияти дарозмуддат ва тадбирҳои мушаххасро барои рушди соҳаи об муайян менамоянд.
Президенти Тоҷикистон инчунин таъкид намуданд, ки «мо ният дорем то соли 2030 татбиқи пурраи мудирияти ҳамоҳангшудаи захираҳои обро дар сатҳи миллӣ ва ҳавзавӣ таъмин намуда, низоми муосири илман асоснок, устувор ва самаранок таъсис диҳем.
Ҳамзамон бо ин, мо талош дорем, ки то соли 2040 дастрасӣ ба оби мутамарказро ҳадди ақалл барои 90 фоизи аҳолӣ таъмин намоем».

Дар ин замина таъкид шуд, ки ба ин васила дастрасии ҳар шаҳрванди Тоҷикистон ба оби тозаи ошомиданӣ кафолат дода мешавад. Тоҷикистон нақша дорад, ки миқёси технологияҳои сарфакунандаи обро зиёда аз чил баробар афзоиш дода, истифодаи самараноки ин неъмати бебаҳо–обро ба абзори калидии мутобиқшавӣ ба тағйирёбии иқлим табдил диҳад.

Марзия САИДЗОДА,
АМИТ «Ховар»

АКС: АМИТ «Ховар»