Тшилидзи Марвала: «Пешсафии Эмомалӣ Раҳмон дар соҳаи энергияи «сабз» ҷомеаи ҷаҳонро илҳом мебахшад»

ДУШАНБЕ, 25.05.2026 /АМИТ «Ховар»/. Пешсафии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар самти истифодаи оқилонаи захираҳои обӣ ва рушди энергияи «сабз» барои тамоми ҷаҳон намунаи илҳомбахш мебошад. Дар ин хусус имрӯз Ректори Донишгоҳи СММ — муовини Дабири кулли Созмони Милали Муттаҳид Тшилидзи Марвала пас аз мулоқот бо Пешвои миллат изҳори назар намуд, хабар медиҳад мухбири АМИТ «Ховар».

«Тоҷикистон манбаи захираҳои обӣ дар Осиёи Марказӣ мебошад. Истифодаи ин иқтидор барои рушди босуръати энергияи “сабз” таассуроти нек ба бор меорад», — таъкид намуд Тшилидзи Марвала.

Ба иттилои Ректори Донишгоҳи СММ-муовини Дабири кулли СММ, истеҳсоли 98 фоизи неруи барқ дар Тоҷикистон аз ҳисоби манбаъҳои аз ҷиҳати экологӣ тоза на танҳо барои давлатҳои минтақа, балки барои тамоми ҷомеаи байналмилалӣ намуна мебошад.

Мавсуф инчунин ҳадафи стратегии Тоҷикистонро оид ба таъмини пурраи кишвар бо энергияи “сабз” то соли 2032 баланд арзёбӣ намуд.

«Ин ҳадаф воқеан илҳомбахш аст», — изҳор дошт ӯ.

Тшилидзи Марвала ба Президенти Тоҷикистон барои ташаббуси дастгирии Ҷоизаи об изҳори сипос намуда, таъкид кард, ки Донишгоҳи Созмони Милали Муттаҳид аз ин иқдом пурра ҷонибдорӣ менамояд.

Ҳамчунин, ба ақидаи ӯ, дар айни замон масъалаи ифтитоҳи намояндагии Донишгоҳи Созмони Милали Муттаҳид дар Тоҷикистон мавриди баррасӣ қарор дорад.

Дар анҷом Тшилидзи Марвала ба ҷониби Тоҷикистон барои пазироии самимӣ ва меҳмоннавозӣ изҳори миннатдорӣ намуда, таъкид кард, ки аз сатҳи роҳбарӣ ва дастовардҳои Тоҷикистон таассуроти амиқ бардошт.

Пайрав ҚОСИМ,
АМИТ «Ховар»

АКС: АМИТ «Ховар»