Ҳукумати Тоҷикистон ҳамкориро бо созмонҳои молиявии байналмилалӣ бо мақсади ҷалби сармоя тақвият медиҳад

ДУШАНБЕ, 29.05.2026 /АМИТ «Ховар»/. Ҳукумати Тоҷикистон ҳамкориро бо созмонҳои молиявии байналмилалӣ бо мақсади ҷалби сармоя ба иқтисоди мамлакат тақвият мебахшад, иттилоъ медиҳад АМИТ «Ховар» бо истинод ба Бонки миллии Тоҷикистон.

Дар ин замина Раиси Бонки миллии Тоҷикистон Фирдавс Толибзода бо ҳайати намояндагони ширкатҳои байналмилалии молиявии «J.P.Morgan», «Loomis Sayles&Company», «Morgan Stanley Investment Management» ва «Global Evolution» мулоқот намуд.

Дар мулоқот масъалаҳои марбут ба вазъи иқтисоди ҷаҳонӣ ва минтақавӣ, дурнамои рушди иқтисодиёти Ҷумҳурии Тоҷикистон, ислоҳоти бахши молиявию бонкӣ ва имконоти ҷалби сармоя баррасӣ карда шуданд.

Ҷонибҳо инчунин ба татбиқи меъёрҳои байналмилалӣ дар бахши бонкӣ ва рушди хизматрасониҳои рақамии молиявӣ таваҷҷуҳ зоҳир намуданд.

Раиси Бонки миллии Тоҷикистон Фирдавс Толибзода иброз намуд, ки солҳои охир шумораи кортҳои пардохтӣ, ҳамёнҳои электронӣ ва ҳаҷми амалиёти ғайринақдӣ дар кишвар ба таври назаррас афзоиш ёфта, раванди рақамикунонии иқтисодиёт вусъати бештар касб намудааст.

Гуфта шуд, ки барои сармоягузорони хориҷӣ дар бахши молиявию бонкии кишвар шароити мусоид фароҳам оварда шуда, дар ин замина рушди маблағгузории иқтисоди «сабз», таҳкими инфрасохтори рақамӣ ва дастгирии соҳибкории хурду миёна ҳамчун самтҳои афзалиятнок арзёбӣ мегарданд.

Дар анҷоми мулоқот ҷонибҳо барои идомаи муколамаи созанда ва омӯзиши самтҳои ҳамкорӣ дар бахшҳои молия, сармоягузорӣ ва низоми бонкӣ изҳори ҳавасмандӣ намуданд.

Мулоқоти мазкур дар доираи иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ва дар ҳамкорӣ бо Бонки миллии Тоҷикистон ва ташкилоти молиявии байналмилалӣ, аз ҷумла «J.P. Morgan» бо мақсади ҷалби сармоя ба иқтисодиёти кишвар доир гардид.

АКС: Бонки миллии Тоҷикистон