Вакилони Маҷлиси намояндагон дар Форуми дуюми занони Осиё иштирок намуданд

ДУШАНБЕ, 16.05.2026 /АМИТ «Ховар»/. Вакилони Маҷлиси намояндагони Маҷлиси Олии Ҷумҳурии Тоҷикистон дар Форуми дуюми занони Осиё, ки 13-15 май дар шаҳри Бухорои Ҷумҳурии Узбекистон баргузор гардид, иштирок намуданд, хабар медиҳад АМИТ «Ховар».

Форуми мазкур ҳамчун платформаи байналмилалӣ барои баррасии масъалаҳои марбут ба баробарии гендерӣ ва тавонмандсозии занон дар минтақа доир гардида, намояндагони парлумонҳо, олимон, соҳибкорон ва коршиносонро аз зиёда аз 40 кишвари Осиё ва созмонҳои байналмилалӣ ба ҳам овард.

Мавзуи асосии форум «Сармоягузорӣ ба занон — асоси рушди устувор: васеъ намудани имконияти сиёсӣ, иқтисодӣ, иҷтимоӣ ва экологии занон» буд.

Зимни чорабинӣ масъалаҳои баланд бардоштани нақши занон дар идоракунии давлатӣ ва равандҳои сиёсӣ, дастгирии соҳибкории занон ва таъмини мустақилияти иқтисодии онҳо, саҳми занон дар илм, технология, зеҳни сунъӣ ва амнияти рақамӣ, инчунин таҳкими заминаҳои ҳуқуқии ҳифзи ҳуқуқи занон ва мубориза бо зӯроварии гендерӣ мавриди баррасӣ қарор гирифтанд.

Инчунин иштирокчиёни форум доир ба мубодилаи таҷриба, таҳкими ҳамкории байналмилалӣ ва густариши нақши занон дар иқтисод, сиёсат ва илм табодули назар намуданд.

Аз рӯйи натиҷаҳои форум Эъломияи Бухоро оид ба таҳкими нақши занон дар ҷомеа қабул гардида, шабакаи минтақавии занон-олимони Осиёи Марказӣ — «SheScience Central Asia» таъсис дода шуд.

Ҳамзамон дар доираи чорабинӣ намоиши маҳсулоти миллии занони соҳибкор баргузор гардид.

АКС: АМИТ «Ховар»