Муносибатҳои тиҷоратию иқтисодии Тоҷикистон ва Словения густариш меёбанд

ДУШАНБЕ, 06.05.2026. /АМИТ «Ховар»/.  Вазъи кунунии муносибатҳои тиҷоратию иқтисодии Тоҷикистон ва Словения 6 май зимни вохӯрии Раиси Палатаи савдо ва саноати Ҷумҳурии Тоҷикистон Фарҳодшоҳ Раҳмонализода бо Сафири Фавқулода ва Мухтори Ҷумҳурии Словения дар Ҷумҳурии Тоҷикистон Аленка Сухадолник баррасӣ  гардид, хабар медиҳад АМИТ «Ховар» бо истинод ба ин палата.

Иброз гардид, ки бо шарофати сиёсати хирадмандона ва дурбинонаи Президенти Ҷумҳурии Тоҷикистон муҳтарам Эмомалӣ Раҳмон муносибатҳои Тоҷикистон бо давлатҳои Иттиҳоди Аврупо, аз ҷумла Ҷумҳурии Словения вориди марҳилаи нави рушд гардидааст.

Дар вохӯрӣ ҷонибҳо вазъи кунунии ҳамкории иқтисодию тиҷоратиро баррасӣ намуданд. Аз ҷумла, гардиши савдои дуҷониба давоми солҳои охир тамоюли рушдро касб намудааст. Таъкид гардид, ки иқтидори воқеии ду давлат барои тавсеаи савдо ва сармоягузорӣ хеле зиёд мебошад.

Инчунин оид ба таъсиси Шурои кории Тоҷикистону Словения барои барқарор намудани робитаҳои мустақими B2B, ҷалби ширкатҳои пешрафтаи дорусозии Словения барои таъсиси корхонаҳои муштараки истеҳсолӣ дар минтақаҳои озоди иқтисодии Тоҷикистон, ҳамкорӣ дар соҳаи энергетикаи «сабз», технологияҳои баланд ва рақамикунонии иқтисодиёт даъват ба амал оварда шуд.

Дар анҷоми вохӯрӣ ҷонибҳо барои густариши ҳамкории амалӣ ва иштироки доираҳои соҳибкории ҳарду давлат дар намоишгоҳҳои байналмилалии Тоҷикистону Словения изҳори омодагӣ намуданд.

АКС: Палатаи савдо ва саноати Ҷумҳурии Тоҷикистон