Жанна Исина: «Баргузории конфронси сатҳи баланд дар Душанбе мавқеи байналмилалии Тоҷикистонро тақвият медиҳад»
ДУШАНБЕ, 12.05.2026 /АМИТ «Ховар»/. Баргузории конфронси сатҳи баланд дар Душанбе мавқеи байналмилалии Тоҷикистонро тақвият медиҳад. Он ҳамкориро бо кишварҳои минтақа густариш дода, лоиҳаҳои нави муштаракро ба бахши кишоварзӣ ҷалб мекунад. Чунин иброз дошт дар суҳбат ба хабарнигори АМИТ «Ховар» мудири шуъбаи карантини растаниҳо дар Институти ҳифзи растаниҳо ва карантини Қазоқистон Жанна Исина.
Намояндаи Қазоқистон ҳамзамон таассуроташро аз сафар ба Тоҷикистон ва пойтахти он — шаҳри Душанбе чунин баён намуд: «Ман мардуми меҳмоннавози тоҷик, обу ҳавои хуш ва шаҳри сарсабзи Душанберо хеле дӯст доштам. Ман дар Алмато зиндагӣ мекунам ва фикр мекардам, ки Алмато шаҳри сабз аст, аммо Душанбе воқеан ба ман илҳоми тоза бахшид. Ба шаҳри Душанбе дарахтони зиёди ҳамешасабз, гулҳои зебою гуногун ва рангоранг ҳусни тоза зам намудаанд. Воқеан ҳам Душанбе шаҳри гулҳост».
Ба андешаи Жанна Исина, Конфронси 35-уми минтақавии Созмони озуқаворӣ ва кишоварзии Созмони Милали Муттаҳид барои Аврупо ва Осиёи Марказӣ дар Душанбе ба мубориза бо ҳашароти зараррасони малах, ки ҳамчун таҳдиди ҷиддӣ барои кишоварзӣ дар якчанд кишвари минтақа боқӣ мемонад, нигаронида шудааст.
Давоми чанд рӯз иштирокчиёни форум дурнамои рақамикунонӣ дар соҳаи кишоварзӣ, амнияти озуқаворӣ, истифодаи устувори захираҳои табиӣ, татбиқи роҳҳои ҳалли инноватсионӣ ва рушди минбаъдаи ҳамкории минтақавиро баррасӣ хоҳанд кард.
Бояд гуфт, ки дар Конфронси 35-уми минтақавии Созмони озуқаворӣ ва кишоварзии Созмони Милали Муттаҳид барои Аврупо ва Осиёи Марказӣ беш аз 550 намоянда аз 54 давлати аъзо ва нозир, инчунин тақрибан 20 созмони байналмилалӣ ва минтақавӣ иштирок доранд.
Яке аз мавзуъҳои асосии форум тақвияти ҳамкорӣ байни давлатҳои минтақа дар соҳаи ҳифзи растаниҳо, мубориза бо ҳашароти зараррасон, ҷорӣ намудани технологияҳои муосир дар соҳаи кишоварзӣ ва баланд бардоштани устувории истеҳсолоти кишоварзӣ ба раванди тағйирёбии иқлим мебошад.
Ёдовар мешавем, ки Конфронси 35-уми минтақавии Созмони озуқаворӣ ва кишоварзии Созмони Милали Муттаҳид (FAO) барои Аврупо ва Осиёи Марказӣ дар Душанбе 11 май ифтитоҳ гардида, то 15 май идома меёбад. Он яке аз бузургтарин платформаҳои минтақавӣ барои муҳокимаи амнияти озуқаворӣ, кишоварзии устувор ва рушди бахши кишоварзӣ хоҳад шуд.
Марзия САИДЗОДА,
АМИТ «Ховар»
АКС: АМИТ «Ховар»
Таъсиси Маркази миллии маълумоти зондкунии фосилавии Замин дар шаҳри Душанбе баррасӣ шуд
Тавсеаи ҳамкории Тоҷикистон бо ЮНИСЕФ дар соҳаи ҳифзи муҳити зист баррасӣ гардид
Дар Душанбе Форуми байналмилалии нассоҷии Тоҷикистон – 2026 доир мегардад
РАШТ ДАР ДАВРОНИ СОҲИБИСТИҚЛОЛӢ. Мулоҳизаҳо оид ба нақши сиёсати давлатӣ дар рушди иқтисодию иҷтимоии ин ноҳия
Дар Тоҷикистон шумораи субъектҳои хоҷагидори амалкунанда беш аз 100 ҳазор зиёд гардидааст
Дар Тоҷикистон дар 25 соли охир ҳаҷми истеҳсоли маҳсулоти кишоварзӣ 122 баробар афзоиш ёфтааст
Кормандони Бонки миллии Тоҷикистон ҷашни Истиқлоли давлатиро бошукуҳ таҷлил намуданд
Эмомалӣ Раҳмон: «Даромади буҷети давлатӣ дар солҳои соҳибистиқлолӣ беш аз 250 баробар зиёд гардид»
Пешвои миллат Эмомалӣ Раҳмон: «То соли 2037 Тоҷикистонро пурра ба кишвари «сабз» табдил медиҳем»
РОҲИ 35-СОЛАИ НИЗОМИ БОНКИИ ТОҶИКИСТОН: аз бунёди низоми мустақили бонкӣ то бонкдории рақамӣ
РУШДИ САНОАТ. Дар давраи Истиқлолияти давлатӣ Душанбе ба маркази воқеии саноат, савдо ва хизматрасонӣ табдил ёфт
Эмомалӣ Раҳмон: «Бо саҳми соҳибкорони ватандӯст ва шахсони саховатпеша зиёда аз 10 ҳазор километр роҳҳои маҳаллӣ навсозӣ гардида, 273 пул бунёд гардид»
