Ҳамкории Бонки миллии Тоҷикистон бо Хазинаи байналмилалии асъор тавсеа меёбад

ДУШАНБЕ, 02.06.2026 /АМИТ «Ховар»/. Истифодаи нишондиҳандаҳои муосири арзёбӣ ва назорати хавфҳо барои баланд бардоштани самаранокии фаъолияти низоми бонкӣ, таъмини суботи молиявӣ ва пешгирии омилҳои манфии хавфҳои эҳтимолӣ аҳамияти зиёд дошта, тавсияҳои коршиносони Хазинаи байналмилалии асъор ба таҳкими устувории молиявӣ ва такмили низоми муосири идоракунии хавфҳо дар Бонки миллии Тоҷикистон мусоидат хоҳанд кард. Ин матлаб зимни мулоқоти Раиси Бонки миллии Тоҷикистон Фирдавс Толибзода бо коршиносони Хазинаи байналмилалии асъор таҳти роҳбарии Санҷив Матай, ки дар шаҳри Душанбе баргузор шуд, баён гардид.

АМИТ «Ховар» бо истинод ба Бонки миллии Тоҷикистон иттилоъ медиҳад, ки дар мулоқот ҷонибҳо оид ба масъалаҳои марбут ба баҳодиҳии фаъолият ва заминаи меъёрӣ дар самти идоракунии хавфҳои Бонки миллии Тоҷикистон, аз ҷумла арзёбии амалии «Сиёсати идоракунии хавфҳо дар Бонки миллии Тоҷикистон», такмили низоми идоракунии хавфҳои амалиётӣ, таҳияи нишондиҳандаи хавфпазирӣ (Risk Appetite Framework) ва нишондиҳандаҳои калидии хавфҳои амалиётӣ (KRI), инчунин роҳҳои коҳиш додани таъсири хавфҳои эҳтимолӣ ба фаъолияти Бонки миллии Тоҷикистон ва мутобиқ намудани механизмҳои идоракунӣ ба стандартҳои байналмилалӣ табодули афкор намуданд.

Фирдавс Толибзода аз ҳамкории пурмаҳсулу гуногунҷанбаи Хазинаи байналмилалии асъор ва Бонки миллии Тоҷикистон, ки ҳадафи он рушди идоракунии хавфҳо дар Бонки миллии Тоҷикистон мебошад, изҳори қаноатмандӣ намуд. Ӯ иброз дошт, ки Бонки миллии Тоҷикистон дар самти такмили низоми идоракунии хавфҳо ва ҷорӣ намудани таҷрибаҳои пешрафтаи байналмилалӣ тадбирҳои саривақтӣ андешида, ҳамкориро бо ташкилотҳои молиявии байналмилалӣ густариш медиҳад.

Роҳбари ҳайати коршиносони Хазинаи байналмилалии асъор Санҷив Матай барои тавсеаи ҳамкории дуҷонибаи судманд дар самти таҳлил ва идоракунии хавфҳо, аз ҷумла хавфҳои амалиётӣ, низоми комплайнс, хавфҳои корреспондентӣ, киберамният, технологияҳои иттилоотӣ (IT) ва дигар бахшҳои марбут ба ин самт омодагиашро баён намуд.

АКС: Бонки миллии Тоҷикистон