Ҳаракати қатораи мустақими мусофирбар дар масири Душанбе — Москва барқарор карда шуд

ДУШАНБЕ, 03.06.2026 /АМИТ «Ховар»/. Шуруъ аз 21 июни соли равон ҳаракати қатораи мустақими мусофирбар дар масири Душанбе — Москва барқарор карда мешавад, иттилоъ медиҳад АМИТ «Ховар» бо истинод ба Вазорати нақлиёти Ҷумҳурии Тоҷикистон.

Қатораи мусофирбар дар масири «Душанбе – Маскав», ки аз ҷониби Корхонаи воҳиди давлатии «Роҳи оҳани Тоҷикистон» ташкил карда шудааст, дар ду ҳафта як маротиба ҳаракат мекунад.

Ҳаракати қатора дар масири Душанбе –Москва рӯзи якшанбе, 21 июн соати 3:25 (вақти маҳаллӣ) ба роҳ баромада, рӯзи чоршанбе соати 22:08 ба истгоҳи Павелетскийи Москва ворид мешавад. Аз Москва 25 июн, рӯзи панҷшанбе, соати 6:05 (вақти Маскав) ба роҳ баромада, рӯзи душанбе, соати 2:48 (вақти маҳаллӣ) вориди Душанбе мегардад.

Вақти сафар тақрибан чор рӯзро дар бар гирифта, қатора аз ҳудуди Тоҷикистон, Узбекистон, Қазоқистон ва Русия мегузарад. Дар Бухоро, Нуқус, Кунграт, Кандиагаш, Актобе, Сол-Илетск, Оренбург, Самара, Сизрани, Кузнетск, Пенза, Ряжск, Скопина, Ожерелйе ва дигар маҳалҳои аҳолинишин таваққуфи қатора барои вуруд ва фуруди мусофирон пешбинӣ шудааст.

Мусофирон метавонанд чиптаҳоро 45 рӯз пеш аз ҳаракат ба расмият дароранд. Чиптаҳо аз Душанбе аллакай ба фурӯш бароварда шудаанд ва фурӯши чиптаҳо аз Маскав дертар оғоз мешавад.

Нархи чипта ба қатораи «Душанбе – Маскав» барои 21 июн дар вагони платскарт 2 ҳазору 617,6 сомонӣ (20 ҳазору 089 рубл) ва дар вагони купе 3 ҳазору 713,42 сомонӣ (28 ҳазору 499 рубл) муқаррар гардидааст.

Алҳол байни Тоҷикистон ва Русия се қатораи Корхонаи воҳиди давлатии «Роҳи оҳани Тоҷикистон» дар масири «Кӯлоб – Волжский» (ҳафтае як маротиба), «Душанбе – Волжский» (ҳафтае як маротиба) ва «Хуҷанд – Волжский» (ҳафтае як маротиба) мусофир мекашонанд.

Ҳаракати қатораҳо дар масири Душанбе –Москва бо ибтикори Корхонаи воҳиди давлатии «Роҳи оҳани Тоҷикистон» дар ҳамкорӣ бо Ҷамъияти саҳомии кушодаи «Роҳҳои оҳани Русия» ва бо мувофиқа бо маъмурияти роҳи оҳани Қазоқистон ва Узбекистон аз нав барқарор карда шудааст.

АКС: Вазорати нақлиёти Ҷумҳурии Тоҷикистон